बजारमा नयनराज पाण्डेको ‘जियरा’ 

काठमाडौं- लेखक नयनराज पाण्डेको नवीनतम कृति ‘जियरा’ सोमबारबाट बजारमा आएको छ। गत चैतमै पुस्तक बजारमा पठाउने तयारी गरिए पनि कोभिड सङ्क्रमितको सङ्ख्या बढेको, मृत्युदर पनि उकालो लागेलगत्तै निषेध आदेश जारी हुने हल्लाले पुस्तकलाई बजारमा पठाउन सकिएको थिएन। पछि वैशाख १६ देखि निषेध आदेश जारी भयो। यसबीचमा पुस्तक बजार ठप्पप्रायः रह्यो। 

असार १ देखि बिहान ११ बजेसम्म पुस्तक पसल पनि सञ्चालन गर्न दिने सरकारको निर्णय गरेको भन्दै पुस्तक बजारमा पठाइएको हो। कुनै सार्वजनिक कार्यक्रम नगरी पुस्तक बजार पठाइएको बताइएको छ। 

कथा सङ्ग्रहमा पाण्डेले पछिल्लो समयमा लेखेका १३ ओटा लामा कथा समावेश छन्। ‘जति किताब लेखिसके पनि आफ्नो नयाँ पुस्तक प्रकाशन हुँदा लेखक उत्साहित नै हुन्छ, म पनि उत्साहित छु,’ लेखक पाण्डेले भने, ‘यो उत्साहमा पाठकको प्रतिक्रिया बुझ्ने मेरो हुटहुटी पनि मिश्रित छ। मैले एउटै पात्रका बहुल रूप, एउटै कथामा बहुल कथानक र बहुल परिवेश अनि कथामा यथार्थ र मिथकको सम्मिश्रणले आख्यानको एउटा बेग्लै आभामण्डल निर्माण गर्ने प्रयास गरेको छु। त्यसमा म कति सफल भएँ, त्यो जान्न म व्यग्र प्रतीक्षामा छु।’

मधेसको पृष्ठभूमिमा लेखिएका कथाहरूको सङ्ग्रह ‘जियरा’मा लेखक पाण्डेले आफ्नै पूर्ववर्ती लेखन पद्धति भत्काउँदै कथावाचनको पृथक् र प्रयोगमूलक शिल्प अनि शैलीसित पाठकलाई परिचित गराउने प्रकाशकको भनाइ छ। मुख्य कथाभित्र विभिन्न उपकथा बुन्ने कला लेखकसँग छ। 

जादुयी यथार्थवादी कथाहरूको मानक बनेर आएको पाण्डेको सङ्ग्रह पुँजीवाद, भ्रष्ट राजनीति र राजनीतिक संस्थापन, लोभ अनि पितृसत्ताको बलियो आलोचना रहेको प्रकाशन गृह फाइनप्रिन्टका अजित बरालले बताए। ‘मलाई लाग्छ, पाण्डेका पूर्वप्रकाशित कृति ‘उलार’ र ‘लू’ले जसरी ‘जियरा’ले पनि नेपाली आख्यानमा दरिलो उपस्थिति जनाउनेछ,’ उनले भने। पुस्तक फाइनप्रिन्टले प्रकाशन गरेको हो। यसको मूल्य ४७५ रुँपैयाँ छ।