आजका अखबार : थपिए हवाई रुट, देउवा झन कमजोर

काठमाडौं - राजधानीबाट प्रकाशित आइतबारका राष्ट्रिय दैनिक पत्रिकाहरुले हवाई प्रवेश विन्दु थपिएको विषयलाई प्राथमिकतामा पारेका छन् । 

भारतीय आकाश हुँदै नेपाल प्रवेश गर्ने विमानले अब सिमराबाट मात्रै छिर्नु पर्ने बाध्यता हटेको छ । छिर्न अब विराटनगर, जनकपुर तथा महेन्द्रनगरको बोर्डरबाट पनि अब विमान नेपाल छिर्न पाउने गरि सहमती भएको विषयलाई कान्तिपुर र अन्नपूर्ण पोस्ट्ले मुख्य समाचार बनाएका छन् । 

यस्तै आजका पत्रपत्रिकाले सत्तारुढ दलका सांसदलाई प्रधानमन्त्री केपी ओलीले बजेटको विरोध नगर्न अपिल गरेको, कांग्रेस सभापति शेरबहादुर देउवाले प्रमुख तीन भातृसंस्थामा पकड गुमाएकोलगायतका विषयलाई विशेष महत्व दिएर छापेका छन् । 

थपिए नयाँ हवाई प्रवेश विन्दु

अन्नपूर्ण पोस्ट्मा प्रकाशित खबर अनुसार पूर्व तथा पश्चिम दिशा हुँदै नेपाल आउने जहाजका लागि थप चार वटा प्रवेश विन्दु थपिएका छन् ।

अन्तर्राष्ट्रिय उडानमा नेपाललाई थप प्रवेश मार्ग उपलब्ध गराउने विषयमा भारतीय पक्ष सहमत भएसँगै नयाँ रुट थपिएको नेपाल नागरिक उड्डयन प्राधिकरणका प्रवक्ता वीरेन्द्रप्रसाद श्रेष्ठले जानकारी दिए ।

प्राधिकरण र भारतीय विमानपत्तन प्राधिकरणको प्राविधिक टोलीबीच काठमाडौंमा बिहीबार र शुक्रबार भएको छलफलमा नयाँ रुटको विषयमा सहमति भएको हो ।

सहमतिपत्रमा नेपालका तर्फबाट नेपाल नागरिक उड्डयन प्राधिकरणका उपमहानिर्देशक तथा एयर नेभिगेसन विभागका प्रमुख नरेन्द्रबहादुर थापा क्षेत्री र भारतीय विमानपत्तन प्राधिकरणको एयर नेभिगेसन विभागका अनिलकुमार दत्ताले हस्ताक्षर गरेका थिए ।

नेपाल र भारतीय पक्षबीच सन् २०१६ को डिसेम्बरदेखि नयाँ हवाई मार्गबारे छलफल सुरु भएको थियो । दुई पक्षीय वार्तामा भारतीय पक्षले काठमाडौं-विराटनगर, काठमाडौं-जनकपुर, काठमाडौं-जनकपुर-पटना र महेन्द्रनगर हुँदै नेपाल आउने जहाजका लागि १४ हजार फिटदेखि २४ हजार फिटको उचाइमा मात्रै प्रवेश दिने गरी सहमति भएको श्रेष्ठले जानकारी दिए ।

देउवा झन कमजोर

कांग्रेसभित्र नेतृत्व परिवर्तनको मुद्दा उठिरहेका बेला त्यसैलाई बल पुग्ने गरि पार्टीमा सभापति शेरबहादुर देउवाको प्रभाव खुम्चिन थालेको छ ।

हालै सम्पन्न तीन भ्रातृसंस्थाको निर्वाचन परिणामले देउवाको प्रभाव घट्दै गएको पुष्टि गरेको हो । 

कान्तिपुरमा प्रकाशित खबर अनुसार पार्टीको प्रभावशाली तथा सदस्य संख्या ठूलो भएको भ्रातृसंस्था ट्रेड युनियन कांग्रेसमा देउवाविरोधी खेमा एकलौटी विजयी भएको छ ।

७ पदाधिकारी सहित ४१ पदमा शुक्रबार भएको निर्वाचनमा देउवा सदस्यिय प्यानलबाट एक सदस्य मात्रै निर्वाचित भए । सबै पदाधिकारीसहित अन्य सदस्य संस्थापनइतर पक्षले जितेको छ । 

ढेड महिना यता भएको अधिवेशनमा पार्टीका प्रभावशाली भ्रातृ तथा शुभेच्छुक संस्था नेपाल शिक्षक संघ र नेपाल निजमति कर्मचारी संघसमेत देउवाले आफ्नो पक्षमा राख्न सकेनन् । जबकी यी तिवटै भ्रातृसंस्थामा यसअघि बहुमतसहित देउवा पक्षको नेतृत्व थियो ।