भारतको सीमामा तारबार लगाउन सुदूरपश्चिम प्रदेशसभाका सांसदको माग

धनगढी- सुदूरपश्चिम प्रदेशका प्रदेशसभा सदस्य तारा लामा तामाङले नेपाल–भारतको सीमा क्षेत्रमा तारबार लगाउनुपर्ने बताएका छन्। 

प्रदेश सभाको आठौँ अधिवेशनको ११औं बैठकमा बोल्दै सत्तारुढ दल नेकपा एमालेका सांसद तामाङले सीमावर्ती क्षेत्रमा भारतको ज्यादती बढेको भन्दै तारबार लगाउनुपर्ने बताए।

‘हुलाकी सडकमा काम गर्दा भारतीय सुरक्षाकर्मी आएर डराउने र धम्काउने काम गर्दै आएका छन्’, आइतबार सुदूरपश्चिम प्रदेश सरकारले प्रस्तुत गरेको नीति तथा कार्यक्रममाथिको छलफलका क्रममा बोल्दै तामाङले भने, ‘कञ्चनपुरदेखि दार्चुलासम्म कतै पनि सीमा व्यवस्थित नभएको हुँदा ठूलो बजेट लगानी गरेर संरचना निर्माण गर्न नसके पनि तारबार त गर्नैपर्छ।’ 

उनले तारबार गर्दैमा भारतसँग नराम्रो व्यवहार नहुने बताए। ‘तपाइँ हामी सधैसँगै बस्ने दाजुभाई छुट्दा त घरमा पर्खाल लगाउँछौ। राष्ट्रियतासँग जोडिएको विषयमा हामीले यो कदम उठाउनैपर्छ’, तामाङले भने, ‘नेपाल–भारत हुने आवतजावतलाई व्यवस्थित बनाउनका लागि पनि सीमामा तारबार आवश्यक छ।’ उनी कञ्चनपुरको दक्षिणी क्षेत्रबाट निर्वाचित सासंद हुन्।