निषेध आदेश १ हप्ता थप, अत्यावश्यकबाहेकका क्षेत्र केही खुकुलो

काठमाडौं- काठमाडौं उपत्यकामा निषेध आदेश थप एक हप्ता लम्बिने भएको छ।

उपत्यकाका काठमाडौं, भक्तपुर र ललितपुर जिल्लाका प्रमुख जिल्ला अधिकारीहरुको बैठकले केही खुकुलो पार्दै निषेध आदेश एक हप्ता थप्ने निर्णय गरेको हो।

थप गरिएको निषेध आदेशको समयमा खाद्यान्न, निर्माण तथा पुस्तकपसलहरुलाई केही खुकुलो पारिएको छ।

स्रोतका अनुसार अब खाद्यान्न पसलहरु बिहान ११ बजेसम्म खोल्न पाइनेछ। यसअघि बिहान ९ बजेसम्म मात्र खोल्न पाइन्थ्यो।

यस्तै पुस्तक पसलहरु पनि बिहान ११ बजेसम्म खोल्न पाइने भएको छ। यसअघि पुस्तक पसल खोल्न रोक लगाइएको थियो।

यसैगरी निर्माण सामग्रीका पसलहरु अपराह्न ४ बजेपछि खोल्न पाइने भएको छ।

अनलाइन डेलीभरीलाई सहज बनाइएको छ भने कृषि कार्य सञ्चालन गर्न दिइने भएको छ। यसैगरी भिषा प्रक्रियालाई सहज बनाइने पनि बताइएको छ।

अन्य अत्यावश्यक सेवा भने पूर्ववत् सूचारु रहनेछन्।

यस्ताे छ काठमाडाैंका प्रमुख जिल्ला अधिकारीद्वारा जारी आदेश