सर्‍यो कांग्रेस महाधिवेशन

काठमाडौं– नेपाली कांग्रेसको चौधौं महाधिवेशनको कार्यतालिका हेरफेर गरिएको छ। कांग्रेस पदााधिकारीको शनिबार बसेको बैठकले महाधिवेशन भदौ १६ गतेदेखि १९ गतेसम्म काठमाडौंमा गर्ने निर्णय गरेको हाे।

यसअघि भदौ ७ देखि १० गतेसम्म गर्ने कार्यतालिका थियो। पदाधिकारी बैठकले कार्यतालिका संशोधन गर्दै महाधिवेशनको मिति ९ दिन सार्ने निर्णय गरेको हो।

बैठकले क्रियाशील सदस्यता छानबिन २० असारसम्म गरिसक्ने र २४ असारमा क्रियाशील सार्वजनिक गर्ने निर्णय गरेको छ। केन्द्रीय महाधिवेशन भदौ १६ देखि १९ गतेसम्म गर्ने  साझा प्रस्ताव तय गरिएको र यसलाई अनुमोदनका लागि केन्द्रीय समितिमा पेस गर्ने सहमहामन्त्री डा. प्रकाशशरण महतले जानकारी दिए।

महतका अनुसार वडा तहको अधिवेशन साउन ६ गते, गाउँ/नगरपालिका अधिवेशन साउन ११ गते, प्रदेश सभा क्षेत्रीय अधिवेशन साउन १६ गते गर्न प्रस्ताव गरिएको छ।

यस्तै प्रतिनिधिसभा क्षेत्रीय अधिवेशन÷एक मात्र प्रतिनिधिसभा निर्वाचन क्षेत्र भएको जिल्ला अधिवेशन साउन २० गते, एकभन्दा बढी प्रतिनिधिसभा निर्वाचन क्षेत्र भएको जिल्ला अधिवेशन साउन २४ गते, प्रदेश अधिवेशन भदौ १ र २ गते तथा केन्द्रीय महाधिवेशन भदौ १६ देखि १९ गतेसम्म गर्न प्रस्ताव गरिएको उनले बताए।