चीनसँग ‘कनेक्टिभिटी’ तयार हुने डा. भट्टराईको दाबी

काठमाडौं– नेकपाका नेता तथा परराष्ट्र मामिलाका जानकार डा. राजन भट्टराईले प्रधानमन्त्री केपी ओलीको चीन भ्रमणमा पारवहन र यातायात सम्झौताको कार्यान्वयन मुख्य प्राथमिकतामा रहेको बताएका छन् । 

त्यस क्रममा उक्त सम्झौताको प्रोटोकलमा हस्ताक्षर हुने उनको भनाइ छ । सोही प्रयोजनका लागि दुई मुलुकबीच कागजात आदानप्रदान भइरहेको उनले बताए । 

दुवै छिमेकीसँग कनेक्टिभिटी विस्तार सरकारको प्राथमिकता भएको डा. भट्टराईले बताए । अब भारतजस्तै चीनसँग पनि जलविद्युत विकासका लागि पीटीए आवश्यक भएको उनको भनाइ छ । 

पर्यटन र कृषि क्षेत्रको विकासका लागि चीनको सहयोग महत्वपूर्ण हुने डा. भट्टराईले बताए । नेपालले भारतसँग मात्रै नभई चीनसँग पनि पारवहनको हक खोज्नुपर्ने परराष्ट्रविद् हिरण्यलाल श्रेष्ठले बताए ।