विवादित अभिव्यक्ति दिएका वैद्यले मागे माफी

काठमाडौं- विवादित अभिव्यक्ति दिएका नेपाली कांग्रेसका बागमती प्रदेश सांसद नरोत्तम वैद्यले माफी मागेका छन्। शनिबार प्रदेश सभा बैठक सुरु भएलगत्तै सभामुखसँग समय लिएर बोल्दै उनले आफूले दिएको अभिव्यक्ति फिर्ता लिएका हुन्। 

उनले भावावेशमा आएर त्यसतो अभिव्यक्ति दिन पुगेको भन्दै आत्मालोचना पनि गरेका छन्। 

उनले आफू गान्धीवादी नेता भएको र हत्या हिंसामा विश्वास नगर्ने तथा प्रधानमन्त्री केपी शर्मा ओलीसँग कुनै रिसइबी नरहेको उनको भनाइ छ। 

वैद्यले सो अभिव्यक्ति संसद्को रेकर्डबाट हटाउन पनि अनुरोध गरेका छन्। वैद्यको आग्रहपछि सभामुखले सो अभिव्यक्ति रेकर्डबाट हटाउन निर्देशन दिएका छन्।

यस्तै उनले विज्ञप्ति पनि जारी गरेका छन्। ‘मैले दिएको अभिव्यक्तिप्रति मेरो संसदीय दल नेपाली कांग्रेसले उक्त अभिव्यक्ति फिर्ता लिन निर्देशन गरेको र मैले आफैंले पनि आफूले बोलेको कुरा विभिन्न सामाजिक सञ्जालमा उपलब्ध भिडियो हेर्दा कूटनीति र संसदीय मर्यादा विपरीत रहेको महसुस गरेको’ उनले विज्ञप्तिमा उल्लेख गरेका छन्।