एमालेले भन्यो– प्रधानमन्त्रीको हत्या गर्न दिइएको धम्की निन्दनीय

काठमाडौं- नेपाली कांग्रेसका बागमती प्रदेश सांसद नरोत्तम वैद्यले दिएको अभिव्यक्तिप्रति नेकपा एमालेले आपत्ति जनाएको छ। 

एमालेका प्रवक्ता प्रदीप ज्ञवालीले प्रेस विज्ञप्ति जारी गर्दै वैद्यको अभिव्यक्तिप्रति घोर भर्त्सना गर्दै यो विषय मुलुकको फौजदारी कानुन समेत आकर्षित हुने विषय भएको बताएका छन्। 

‘बागमती प्रदेशसभाको हिजोको बैठकमा एकजना सदस्यले सम्माननीय प्रधानमन्त्री श्री केपी शर्मा ओलीको हत्या गर्न दिएको धम्कीलाई नेकपा (एमाले) ले अत्यन्त गम्भीर रुपमा लिएको छ,’ विज्ञप्तिमा भनिएको छ,‘प्रधानमन्त्रीको हत्याका लागि अरुलाई समेत दुरुत्साहन गर्ने र आवश्यक परे आफै पनि हत्याका लागि तयार रहेको निजको अभिव्यक्ति आपराधिक, अत्यन्त आपत्तिजनक र निन्दनीय छ।’ 

साथै सो विषयमा एमालेले सम्बद्ध राजनीतिक दल कांग्रेसको समेत गम्भीर ध्यानाकर्षण गरेको छ।

यसैबीच नेपाली कांग्रेसले वैद्यलाई सो अभिव्यक्ति फिर्ता लिँदै आत्मालोचना गर्न निर्देशन दिएको छ। वैद्यले पनि आफूले अभिव्यक्ति फिर्ता लिँदै आत्मालोचना गर्ने बताएका छन्।