प्रचण्ड र ओलीलाई प्रश्‍न : ‘मन्त्रीको वडामा बजेट थुपारेर समाजवाद आउँछ ?’

काठमाडौं- नेकपाका सांसदहरूले सरकारले ल्याएको बजेटमा मन्त्रीको क्षेत्रलाई मात्रै प्राथमिकता दिएको बताउँदै चर्को आलोचना गरेका छन् । शनिबार बिहान प्रधानमन्त्री निवास बालुवाटारमा आयोजना गरिएको संसदीय दलको बैठकमा यस्तो प्रश्न उठेको हो । 

बजेट मन्त्रीको क्षेत्रमुखी भएको बताउँदै पार्टीभित्र व्यापक असन्तुष्टि बढेपछि संसदीय दलको बैठक डाकिएको हो । बैठकमा बोल्दै सांसद भीम रावलले पश्चिम सेती जलविद्युत् आयोजनाका लागि बजेट नछुट्याइएको बताउँदै चर्को असन्तुष्टि व्यक्त गरे । 

अर्का सांसद यज्ञराज सुनुवारले मन्त्रीहरूले आफ्नो चुनाव क्षेत्रलाई मात्र बजेट छुट्याएको आरोप लगाए । उनले भने, ‘पहिला मन्त्रीको वडामा मात्र बजेट लगेर त्यहाँबाट  समाजवाद आउँछ ? अरूको वडामा कहिले समाजवाद आउँछ ?’ 

वृद्धभत्ता पाँच सयका दरले भए पनि वृद्धि गर्न सुनुवारले माग गरे । बैठकमा प्रधानमन्त्री केपी ओली र अध्यक्ष पुष्पकमल दाहाल ‘प्रचण्ड’लाई अगाडि राखेर सांसदहरूले आलोचना गरेका थिए । 

कमजोरी भएको प्रधानमन्त्रीको स्वीकारोक्ति

संसदीय दलको बैठकमा बोल्दै प्रधानमन्त्री ओलीले बजेटमा कमी–कमजोरी भएको स्वीकारे । प्रधानमन्त्रीले त्यसलाई सच्याउँदै जाने र अर्थिक समृद्धिको बाटोमा अगाडि बढ्ने जानकारी दिए । 

प्रधानमन्त्री र अध्यक्षलाई हुटिङ

संसदीय दलको बैठकमा सहभागी भएर प्रधानमन्त्री तथा पार्टी अध्यक्ष बाहिरिन आँटेपछि सांसदहरूले हुँदैन भनेर हुटिङ गरेका थिए । सांसदहरूको प्रश्न थियो, ‘तपाईंहरू दुवै जना नभएपछि हामीले कसलाई सुनाउने ?’ त्यसपछि ‘म बस्छु’ भन्दै प्रचण्ड बसेका थिए । बैठक जारी छ ।