भारतको एक अस्पतालले अक्सिजन बन्द गर्दा ५ मिनेटमा २२ को मृत्यु

एजेन्सी- भारतको पारस अस्पतालमा अक्सिजन सप्लाई बन्द हुँदा पाँच मिनेटमा २२ जनाको मृत्यु भएको पाइएकाे छ।

भारतको आगरास्थित पारस अस्पतालले जानीजानी अक्सिजन बन्द गराउँदा २२ जना कोभिड–१९ संक्रमितको मृत्यु भएको हो।

एकैपटक २२ जनाको मृत्यु भएपछि अस्पताल सिल गरिएको छ भने सञ्चालक अरिञ्जय जैनमाथि मुद्दा चलाइएको भारतीय सञ्चार माध्यमले जनाएका छन्।

अस्पतालमा ५५ जना संक्रमितको उपचार भइरहेको थियो। अहिले संक्रमितहरुलाई अन्य अस्पताल सार्ने तयारी भइरहेको छ।

२६ अप्रिलमा अस्पतालमा बिरामीको अत्यधिक चाप बढेकाले पाँच मिनेटका लागि अस्पताल प्रशासनले अक्सिजन सप्लाई बन्द गरेको आरोप छ।

अस्पताल सञ्चालक जैनको एक भिडियो भारतभर भाइरल भइरहेको छ। जसमा उनले बिरामीको अत्यधिक चापका कारण पाँच मिनेट अक्सिजन सप्लाई बन्द गर्दा २२ जनाको मृत्यु भएको भनेका छन्।

अस्पताल सिल गरी सञ्चालकलाई स्पष्टीकरण सोधिएपछि जैनले भिडियोमा सुनिएको स्वर आफ्नो भए पनि आफूविरुद्ध लगाइएका आरोप झुठा भएको दाबी गरिरहेका छन्।

आगराको जिल्ला प्रशाससन कार्यालयले भने अक्सिजको अभावमा २२ जवनाको मृत्यु भएको खबर निराधार झुठो भएको बताएको छ। घटनाबारे अध्ययन अनुसन्धान अहिले पनि भइरहेको छ।