भारतमा भेटिएको डेल्टा भेरियन्ट ४० प्रतिशत बढी संक्रामक : बेलायत

बेलायती स्वास्थ्यमन्त्री म्यान हेनककले भारतमा भेटिएको कोभिड–१९ को डेल्टा भेरियन्ट ४० प्रतिशत बढी संक्रामक रहेको बताएका छन्।
बेलायतले जुन २१ बाट लकडाउन अन्त्य गर्ने योजना बनाएको छ। तर नयाँ भेरियन्ट डेल्टाका कारण लकडाउन खोल्ने अनिश्चित रहेको हेनककको भनाइ छ।

उनले कोरोना भाइरसबाट बच्न जतिसक्दो छिटो खोप लगाउनुपर्ने जनाएका छन्। उनले भनेका छन्, ‘दुवै डोज खोप लगाएर मात्रै भाइरसलाई हराउन सकिन्छ।’  बेलायतले कोरोेना महामारीबाट छुटकारा पाउन १२ देखि १५ वर्ष उमेर समूहका बालबालिकालाई पनि खोेप लगाउन अनुमति दिएको छ। 

‘कोरोना भाइरसबाट बच्न दुवै डोज खोप लगाउनु आवश्यक छ। खोप लगाएर मात्रै हामी संक्रमणको दर र अस्पतालमा भर्ना हुने दर घटाउन सक्छौं’, स्वास्थ्यमन्त्री हेनककले भनेका छन्। बेलायतका ४ करोेड जनसंख्याले कोरोना विरुद्ध पहिलो चरणको खोप लगाइसकेका छन्। बीबीसी