चीनमा उत्पादित सिनोभ्याक खोपलाई नेपालमा प्रयोगको अनुमति

काठमाडौं- सरकारले चीनमा उत्पादित कोरोनाविरुद्धको ‘सिनोभ्याक’ खोपलाई प्रयोगको अनुमति दिएको छ।

चिनियाँ कम्पनी सिनोभ्याक लाइफ साइन्सेस कम्पनी लिमिटेडले उत्पादन गरेको यो खोपलाई शुक्रबार सरकारले प्रयोगको अनुमति दिएको औषधि व्यवस्था विभागले जनाएको छ। यो खोपलाई गत मंगलबार विश्व स्वास्थ्य संगठन (डब्ल्यूएचओ) ले आपतकालीन प्रयोगका लागि अनुमति दिएको थियो।

शुक्रबार बसेको स्वास्थ्य तथा जनसंख्या मन्त्रालयको औषधि व्यवस्था विभागको बैठकले १८ वर्षभन्दा बढी उमेर समूहका मानिसहरुलाई यो खोप लगाउन अनुमति दिने निर्णय गरेको हो। यो खोप २ देखि ८ डिग्री सेन्टिग्रेड तापक्रममा १२ महिनासम्म राख्न सकिने विभागले सूचनामा उल्लेख गरेको छ।

यसअघि नेपालले चिनियाँ कम्पनी सिनोफार्मले उत्पादन गरेको भेरो सेल खोपलाई प्रयोगको अनुमति दिइसकेको छ। उक्त खोप प्रयोग भइरहेको छ। त्यस्तै भारतको सेरम इन्स्टिच्यूटले उत्पादन गरेको कोभिसिल्ड र कोभ्याक्सिन तथा रुसी खोप स्पुतनिक भीलाई प्रयोगको अनुमति दिइसकेको छ।