एमालेका ४ मन्त्रीबाहेक सबैलाई पदमुक्त गर्ने प्रधानमन्त्री ओलीको तयारी

काठमाडौं- प्रधानमन्त्री केपी शर्मा ओलीले मन्त्रीमण्डलको 'व्यापक' हेरफेर गर्ने तयारी गरेका छन्। केपी शर्मा ओली सरकारमा सहभागी भएका एमालेका चार मन्त्रीबाहेक सबै मन्त्री पदमुक्त गर्ने प्रधानमन्त्री ओलीको तयारी छ। 

एमालेबाट अर्थमन्त्री विष्णु पौडेल, भौतिक पूर्वाधार मन्त्री बसन्त नेम्वाङ, कानुनमन्त्री लीलानाथ श्रेष्ठ र शिक्षामन्त्री कृष्ण गोपाल श्रेष्ठबाहेकका सबै मन्त्री पदमुक्त गर्ने ओलीको तयारी रहेको स्रोतले जानकारी दिएको छ। 

एमालेबाट मन्त्री बनेकाहरू ईश्वर पोखरेल, प्रदीप ज्ञवाली, शिवमाया तुम्बाहाङ्फे, पदमाकुमारी अर्याल, गणेशसिंह ठगुन्ना, जुलीकुमारी महतो, प्रेमबहादुर ओले, पार्वत गुरुङ, भानुभक्त ढकाल पदमुक्त गर्ने ओलीको तयारी रहेको बताइएको छ। 

प्रधानमन्त्री ओलीले जसपाको महन्थ ठाकुर-राजेन्द्र महतो पक्षका २ राज्यमन्त्री सहित १० जनालाई मन्त्री बनाउने निश्चित भएपछि एमालेका केही मन्त्रीहरू बहिर्गमनमा पर्ने भएका हुन्। 

ओलीले जसपाका राजेन्द्र महतोलाई उपप्रधानमन्त्री दिने तय भइसकेको छ। यस्तै विष्णु पौडेललाई पनि उपप्रधानमन्त्री बनाउने तयारी रहेको बताइएको छ।