काठमाडौं- सत्तारुढ नेकपा एमालेको असन्तुष्ट पक्षको नेतृत्व गरिरहेका नेता माधवकुमार नेपाल र झलनाथ खनाल समूहको केन्द्रीय कमिटी बैठक आज पनि बस्दै छ। बिहीबारदेखि भर्चुअल माध्यमबाट सुरु भएको बैठक आज पनि बस्न लागेको हो।
केन्द्रीय सदस्य जग्गनाथ खतिवडाले आज बिहान ११ बजे बैठक बस्न लागेको जानकारी दिए। केन्द्रीय सदस्यहरुले बोल्ने क्रम नसकिएकाले आज पुनः बैठक बस्न लागेको हो। बिहीबार करिब ६ घन्टा लामो केन्द्रीय कमिटीको बैठक चलेको थियो।
बैठकमा बोल्ने केन्द्रीय कमिटीका सबै सदस्यहरुले पार्टीलाई २०७५ जेठ २ को अवस्थामा फर्केर लैजाने विषयमा आफूहरू एकताबद्ध भए पनि पार्टी अध्यक्ष केपीशर्मा ओलीले एकता गर्न नचाहेको बताएका थिए। उनीहरूले आफू निकट नेतृत्वलाई कुनै पनि हालतमा ओलीको चालबाजीमा फसेर सहमतिका नाममा अघि बढ्न काम नगर्न पनि ध्यानाकर्षण गराएका थिए।
हिजो बैठकमा बोल्ने केन्द्रीय सदस्यहरूले वार्ताका नाममा अलमलिएर अघि बढ्न नहुने भन्दै छिटो निर्णयमा पुग्नुपर्ने बताएका थिए।
प्रकाशित: Jun 04, 2021| 02:49 शुक्रबार, जेठ २१, २०७८
