भ्रामक समाचार सच्याउन ‘डेलिमेल’लाई लण्डनस्थित नेपाली दूतावासको पत्र

काठमाडाैं - लण्डनस्थित नेपाली दूतावासले बिहीबार ‘डेलिमेल’ले प्रकाशित गरेको समाचारप्रति आपत्ति जनाएको छ। डेलिमेलले बेलायतीहरूको बिदालाई नेपाल भेरियन्टले खतरामा पारेको भनी समाचार प्रकाशन गरेको थियो।

समाचार आधारहीन रहेको र नेपालमा सक्रिय भएका भेरियन्टको उत्पत्ति नेपालमा नभएको तथा विश्व स्वास्थ्य संगठन (डब्ल्यूएचओ)ले पनि नेपालमा नयाँ संस्करणको भेरियन्ट उत्पत्ति भएको भन्ने समाचारको खण्डन गरिरहेको दूतावासले जारी गरेको विज्ञप्तिमा भनिएको छ।

यसका साथै दूतावासले डेलिमेललाई पत्र पठाएर आधारहीन समाचारलाई खण्डन गर्न र यसलाई सच्याउन अनुरोधसमेत गरेको विज्ञप्तिमा जनाइएको छ। विश्व स्वास्थ संगठनले बिहीबार नै ट्वीटर ह्याण्डलमार्फत सार्स–कोभ–२ को तीन किसिमका भेरियन्ट फेला परेको र नेपालमा हाल डेल्टा मात्र पाइएको भनेको छ। साथै नयाँ किसिमको कुनै पनि भेरियन्ट भने फेला नपरेको उल्लेख गरेको छ। रासस