काठमाडौंको टोलीले बनायो प्रदेश २ को प्रहरी ऐनको मस्यौदा

जनकपुरधाम- प्रदेश २ को सरकारले प्रहरी ऐन मस्यौदा तयार पारेको छ । आन्तरिक मामिला तथा कानुन मन्त्रालयले तयार पारेको प्रहरी ऐनको मस्यौदा प्रदेश २ को मन्त्रिपरिषद बैठकले पारित गरेको छ । 

बिहीबार बसेको प्रदेश २ को मन्त्रिपरिषद बैठकले ऐनको मस्यौदा पारित गरेको हो । काठमाण्डौबाट बोलाइएका सुरक्षा विज्ञ र स्थानीय सुरक्षा विज्ञहरुको टोलीको सुझाव अनुसार प्रदेश २ को सरकारले प्रहरी ऐनको मस्यौदा तयार पारेको हो ।

विज्ञहरुको टोलीले विभिन्न चरणमा गरेको छलफलको आधारमा प्रदेश सरकारले ऐनको मस्यौदा तयार पारेको आन्तरिक मामिला तथा कानुन मन्त्री ज्ञानेन्द्रकुमार यादवले जानकारी दिए । मन्त्री यादवका अनुसार एक दुई दिन भित्र मन्त्रिपरिषदले स्वीकृत गरेको प्रहरी ऐनलाई प्रदेशसभामा छलफलको लागि पेश गर्ने तयारी छ । प्रदेशसभाबाट ऐन पारित भएसँगै प्रदेश सरकारले आफ्नै प्रहरी भर्ना गर्ने बाटो खुल्ने छ ।

आइतबार सार्वजनिक विदा

प्रदेश सरकारले आइतबार प्रदेश २ मा सार्वजनिक विदाको घोषणा गरेको छ । विहिबार बसेको मन्त्रिपरिषदको बैठकले मुस्लिम धर्मालम्बीहरुको इद पर्वको अवसरमा आइतबार विदा दिने निर्णय गरेको हो । संघीय सरकारले इद पर्वको विदा कटौती गरेपनि प्रदेश सरकारले इदको अवसरमा विदा दिने निर्णय गरेको छ ।