लागूऔषधको विरोध गर्ने पप्पुलाई जोगबनीमा गोली प्रहार

इटहरी- भारतीय राज्य विहारको अररिया जिल्लाको जोगबनीमा गोली हानिएका सामाजिक कार्यकर्ता पप्पु पटेललार्इ उपचार गर्न नेपाल ल्याइएको छ ।
 
बिहीबार बिहान साढे ११ बजे दुई जना बन्दुकधारीले गोली हानेका पटेललार्इ शुरुमा विराटनगरको नोबेल मेडिकल ल्याइएको पटेलकी छिमेकी किरण रायले बताइन् । नोबेलमा उपचार नभएपछि धरानस्थित बीपी कोइराला स्वास्थ्य विज्ञान प्रतिष्ठान पुर्याइएको पीडितका बाबु भुटाय पटेलले जानकारी दिए । जोगबनीआसपासका भारतीयहरू आँखाको उपचारमा लागि समेत विराटनगर नै आउने गर्छन् । गोली लागेका पटेलको पनि जोगबनीमा राम्रो स्वास्थ्य संस्था नभएकाले विराटनगर ल्याइएको पीडितकी छिमेकी किरण रायले बताइन् । 

पटेलसँगै उपचारमा आएकी छिमेकी किरण रायका अनुसार लागूऔषध प्रयोग गर्नु हुन्न भन्ने विषयमा विभिन्न कार्यक्रम गर्दै आएका पटेललार्इ लागूऔषध प्रयोगकर्ताहरूले आक्रमण गरेका थिए । सम्झाउन खोज्दा गोली हानिएको रायले बताइन्। बीपी कोइराला स्वाथ्य विज्ञान प्रतिष्ठानस्थित नेपाल प्रहरी पोस्टका प्रमुख तिलक गिरीका अनुसार पटेललार्इ तीन वटा गोली लागेको छ । दायाँ छाती, बायाँ कम्मरमुनि र दाहिने कोखमा पटेललार्इ गोली लागेको गिरीले जानकारी दिए । 

तीन गोली लागेका पटेल सामान्य बोलचाल गर्न भने सक्ने अवस्थामा रहेको गिरीले बताए । प्रहरीसँगको कुराकानीमा घाइते पटेलले आफूलाई लागूऔषध प्रयोगकर्ताहरूले गोली हानेको बताए । जोगबनीमा पटेललार्इ गोली हान्ने दुई जनालाई भारतीय प्रहरीले पक्राउ गरिसकेको जोगबनीको सीमावर्ति मोरङ प्रहरी प्रमुख एसपी मनोज केसीले बताए । पक्राउ परेकाहरूको बारेमा भने आफूहरूलाई जानकारी नभएको पनि एसपी केसीले बताए । 

प्रदेश १ को अस्थायी राजधानी विराटनगर पारि रहेको जोगबनी नेपालमा पनि लागूऔषध ओसार्ने थलोका रूपमा रहेको छ । हरेक दिनजसो प्रहरीले जोगबनी नाकाबाट लागूऔषध ओसार्ने भरियाहरू र प्रयोगकर्ता पक्राउ गर्छ ।