प्रहरी हिरासतमै अनसन

जनकपुरधाम- जनकपुर अञ्चल अस्पतालका मेडिकल सुपरिटेन्डेन्टलाई कालोमोसो दलेको आरोपमा पक्राउ परेका ६ जना प्रहरी हिरासतमै अनसनमा बसेका छन् । 

कालोमोसो दलेको आरोपमा पक्राउ परेका राकेश विक्रम साह, अखिल मधिकर्मी, रमेश यादव, विपिन साह, अमित पाठक र विजय मेहताले बिहिबार देखि प्रहरी हिरासतमा अनसन बसेका हुन् । मेडिकल सुपरिटेन्डेन्ट डा.रामपरीक्षण यादवलाई कालोमोसो दलेको आरोपमा प्रहरीले ६ जनलाई नियन्त्रणमा लिएको छ । पक्राउ परेका राकेश विक्रम नेपाल तरुण दल धनुषाका उपसभापति हुन् । पक्राउ परेकाविरुद्ध प्रहरीले सार्वजनिक अपराध मुद्दा चलाएको छ ।

यता प्रहरीले पक्राउ गरेकाहरुलाई रिहा गर्नुपर्ने माग राख्दै नेवि संघ र नेपाल तरुण दलले बिहिबार जिल्ला प्रशासन कार्यालय धनुषा अगाडी एक घण्टा धर्ना दिएको छ । अस्पताल सुधार गर्न जनसरोकारको विषय उठाउँदा प्रहरीले युवाहरुलाई पक्राउ गरेको भन्दै तत्काल रिहाईको माग राख्दै उनीहरुले धर्ना दिएका हुन् ।

केही दिन अघि प्रसुतीका लागि अञ्चल अस्पताल पुगेकी जनकपुर उपमहानगरपालिका वडा नम्बर १ की २५ वर्षीया सोनियादेवी ठाकुरको दुई पटकको शल्यक्रिया पश्चात निधन भएको थियो । उपचारमा संलग्न चिकित्सकको लापारबाहीले सोनियाको मृत्यु भएको परिवारजन र आफन्तको आरोप छ । 

सोनिया मृत्युको छानबिन हुनुपर्ने, उपचारमा संलग्न चिकित्सकलाई कारबाही, अस्पतालको स्तरोन्नति लगायतका माग राख्दै स्थानीय युवाहरु अस्पताल प्रमुखलाई ज्ञापन पत्र दिन पुगेका थिए । 

यता पक्राउ परेकाहरुको रिहाईको माग राख्दै स्थानीय अन्य युवाहरु समेत प्रदर्शनमा उत्रिएका छन् । अस्पतालमा गुणस्तरीय सेवा, अस्पताल प्रमुखलाई कारबाही, सोनिया मृत्यु घटनाको छानबिन, पक्राउ परेका युवाहरुलाई रिहा गर्न यहाँका विभिन्न युवा संगठनहरु दिनहुँ प्रदर्शन गर्दै आइरहेका छन् ।