माउन्टेन बाइकर नारायणप्रति श्रद्धाञ्‍जली : तिमीलाई मिस गर्नेर्छौं, कृपया फर्केर आऊ !

काठमाडौं– ‘तिमीलाई धेरै मिस गर्नेर्छौं, तिमी नरहेको विश्वास गर्न सकेका छैनौं । कृपया फर्केर आऊ । तिमी सबै युवा माउन्टेन बाइकरका प्रेरणाको स्रोत थियौ ।’ 

चर्चित् माउन्टेन बाइकर नारायणगोपाल महर्जनको फेसबुक पेजमा बिहीबार बिहान उनका प्रशंसक शैलेन्द्र डंगोलले लेखेका शब्द हुन्, यी । 

श्रीलंकामा आयोजित ‘रम्बल इन दी जंगल २०१८’मा भाग लिन गएका उनको स्थानीय नदीमा डुबेर निधन भएको खबरले परिवार मात्र नभई उनका साथीभाइ र प्रशंसकहरूलाई स्तब्ध बनायो । उनलाई ‘ट्याग’ गर्दै श्रद्धाञ्जली र शोकका वाक्य लेखिरहेका छन्, फेसबुक पेजमा उनका साथीभाइ र प्रशंसकहरू । 

३३ वर्षका उनी राष्ट्रिय एथलेट पनि थिए । साइकलबाटै मुलुकका ग्रामीण भेग डुलिहिँड्ने महर्जनले त्यसैलाई प्यासन बनाएका थिए । त्यसैले त, उनलाई साथीभाइले उपनाम नै दिएका थिए, ‘साइकले’।श्रीलंकाको राष्ट्रिय ध्वजावाहक श्रीलंकन एयरलाइन्सको आयोजना रहेको ‘रम्बल इन दी जंगल २०१८’मा उनी दोस्रो स्थान प्राप्त गर्न सफल भए । तर, त्यो खुशी परिवार र साथीभाइमाझ साट्न पाएनन् । 

स्थानीय प्रहरीका अनुसार ३३ वर्षीय ‘अफरोड साइक्लिस्ट’ साइकलसहित महावेली नदीमा खस्न पुगे । त्यतिबेला उनी ‘रम्बल इन दी जंगल’ अन्तर्गत्कै ‘अफरोड बाइसाइकल रेस’मा सहभागी थिए । 

नदीले बगाएर पाँच सय मिटर टाढा पुर्‍याएका उनलाई उद्धार गरेर स्थानीय क्यान्डी जनरल अस्पताल पुर्‍याइएको थियो । चिकित्सकहरूले मृत घोषणा गरे ।महर्जन ‘एसियन माउन्टेन बाइसाइकल च्याम्पियनसिप’मा आठौं स्थानप्राप्त खेलाडी थिए । फिलिपिन्समा आयोजना हुने ‘एसियन एमटीबी च्याम्पियनसिप’का लागि छनोट भएका थिए । 

राष्ट्रिय खेलकुद परिषद्को ‘माउन्टेन बाइक क्रस कन्ट्री’का स्वर्ण पदक विजेता पनि थिए, महर्जन । उनको पार्थिव शरीर महावेली नदीमै दाहसंस्कार गरिएको छ ।