चीनमा अब तीन सन्तान जन्माउन पाइने

काठमाडौं- चीनमा अब तीन सन्तान जन्माउन पाइने भएको छ। त्यहाँको जोडीले यसअघि बढीमा दुई सन्तान जन्माउन पाउँथे।

दुई सन्तान नीति आएको केही वर्षमै चीन सरकारले तीन सन्तान नीति घोषणा गरेको हो। त्यसअघि लामो समयसम्म चीनमा एक सन्तान नीति लागू भएको थियो।

राष्ट्रपति सी जिनपिङले चिनियाँ कम्युनिष्ट पार्टीको पोलिटव्यूरो बैठकमा यो नीतिलाई प्रमाणित गरिदिएको सिन्ह्वाले जनाएको छ।

चीनमा यसअघिको एक सन्तान नीति र केही वर्षयताको दुई सन्तान नीतिका कारण निकै सुस्त गतिमा जनसंख्या वृद्धि भइरहेको छ। 

तीन सन्तान नीतिले अब बेइजिङमा घट्दो जनसंख्याको प्रभाव न्यूनीकरणका लागि मद्दत पुर्‍याउने विश्वास लिइएको छ।

यसै महिनाको सुरुवातमा सार्वजनिक गरिएको चीनको पछिल्लो जनगणनाको तथ्यांकअनुसार गत वर्ष त्यहाँ लगभग १ करोड २० लाख बच्चा जन्मिएका छन्।

सन् २०१६ मा त्यहाँ १ करोड ८० लाख बच्चा जन्मिएका थिए। गत वर्ष सन् १९६० पछि कम बच्चा जन्मिएका हुन्।