पौडेल र सिटौलालाई देउवाको जवाफ- कांग्रेसमा बल्ल लोकतन्त्र आएछ

काठमाडौं– कांग्रेस सभापति शेरबहाुदर देउवाले कांग्रेसमा बल्ल लोकतन्त्र आएको बताउँदै वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलामाथि कटाक्ष गरेका छन् । 

ट्रेड युनियन कांग्रेसको छैटौं महाधिवेशनलाई सम्बोधन गर्दै देउवाले भने, ‘हिजो गिरिजाप्रसाद र सुशील कोइरालासँग चुइँक्क बोल्न नसक्नेहरूले मलाई गाली गर्न पाएका छन् । कांग्रेसभित्र त बल्ल लोकतन्त्र आएछ ।’

२८ जेठमा पौडेल र सिटौलासहित पूर्वमहामन्त्री प्रकाशमान सिंह र पूर्वसह–महामन्त्री अर्जुननरसिंह केसीले देउवाविरुद्ध मोर्चाबन्दी घोषणा गरेका थिए । त्यसक्रममा उनीहरूले सभापति देउवाले ‘मालिकको चाकडी बजाएर पार्टी बर्बाद बनाएको’ आरोप लगाएका थिए । 

‘हिजो गिरिजाप्रसाद र सुशील कोइरालासँग चुइँक्क बोल्न नसक्नेहरूले मलाई गाली गर्न पाएका छन्’

देउवाले उनीहरूलाई जवाफ दिए, ‘कम्युनिस्टहरूको आलोचना गर्न नसक्नेहरूले मलाई त जति गाली गरे पनि भइहाल्छ नि ।’ 

आफूलाई मन पर्दा सहमति र मन नपर्दा विधान खोजेको बताउँदै देउवाले भने, ‘पार्टीमा एकता कि सहमतिबाट कि विधानबाट हुनु पर्छ रे, कहीं यस्तो हुन्छ ? दुई वटा एकै पटक हुन्छ ?’ आफ्नो विरोध गरेर कम्युनिस्टको चुनौतीसँग लड्न नसकिने उनको जिकिर थियो । 

मलेसियामा ९२ वर्षका महाथिर मोहम्मद फेरि प्रधानमन्त्री बनेको प्रसंग कोट्याए । अनि थपे, ‘म दुई पटक पनि पार्टी सभापति भएको छैन । मेरो उमेर पनि महाथिरजति भएको छैन ।’ 

सम्बोधनका क्रममा देउवाले प्रधानमन्त्री केपी ओलीले जनकपुरमा भारतीय समकक्षी नरेन्द्र मोदीको स्वागतका क्रममा लगाएको लुगाको प्रसंग कोट्याए । र, भने, ‘दूतावासले ओलीजीको लुगाको नाप लिएछ । त्यही लुगा पछि पठाइदिएछ र उहाँ मोदीजीको स्वागतमा जनकपुर पुग्नुभएछ ।’

प्रधानमन्त्री ओलीले भन्ने गरेको समृद्धिविरुद्ध पनि खनिए, देउवा । भने, ‘महँगी बढेको बढ्यै छ, समृद्धि भनेको भन्यै छ ।’ 

अरुण तेस्रो जलविद्युत आयोजना निर्माणको जिम्मा विश्व बैंकलाई राष्ट्रघात देख्ने कम्युनिस्टहरूले भारतलाई सुम्पिँदा भने राष्ट्रवाद ठहर गरेको बताउँदै देउवाले आश्चर्य व्यक्त गरे । ‘यो लम्पसारवाद नभए के हो त ?’ उनले प्रश्न गरे ।