अमिताभ बच्चनको कार्यक्रममा चिठ्ठा पर्‍यो भन्दै ठग्ने पक्राउ

वीरगञ्ज-बलिउड अभिनेता अमिताभ बच्चनले सञ्चालन गर्ने कार्यक्रम 'कौन बनेका करोडपति'मा चिठ्ठा पर्‍यो भन्दै ठगी गर्नेलाई प्रहरीले पक्राउ गरेको छ ।

सामाजिक सञ्जाल फेसबुक, ट्वीटर, ह्वाटसप, ईमोलगायतमा पुरस्कार परेको विवरण देखाउँदै करबापतको रकम उठाएर ठगी गर्नेलाई पक्राउ गरिएको प्रहरीले जनाएको छ ।

पक्राउ पर्नेमा वीरगञ्जका १८ वर्षका अक्षयकुमार चौरासिया, सोही उमेरका युवराज पासवान, २२ वर्षका वीरनारायण चौरासिया र वीरगञ्जको रेल्वे रोडका २२ वर्षकै राहुल राउत रहेको वीरगञ्जका प्रहरी प्रमुख रेवती ढकालले जानकारी दिए ।

उनीहरुको साथबाट नगद एकलाख पाँच हजार, चार थान मोवाईल, विभिन्न नामका परिचयपत्र, आईएमईमा पैसा जम्मा गरेको भौचरलगायत सामग्री पनि बरामद गरिएको छ ।

नेपालमा ठगीको काम गर्ने उनीहरु भारत तथा पाकिस्तानी ठगको एजेन्टका रुपमा काम गर्दै आएको पाइएको प्रहरीले जनाएको छ ।