ट्रम्प र किमजत्तिकै चर्चा बटुल्दै गोर्खा प्रहरी

काठमाडौं- अमेरिकी राष्ट्रपति डोनाल्ड ट्रम्प र उत्तरकोरियाली नेता किम जोङ–उनबीच सोमबारदेखि सिंगापुरको सांग्रिला होटेलमा वार्ता शुरु भएको छ । वार्तास्थलको सुरक्षा व्यवस्था सम्हालेका गोर्खा सिपाहीहरूले यतिबेला संसारको ध्यान आफूतिर तानेका छन् ।

गोर्खालीहरूको इमानदारिता र साहसको संसारभर प्रशंसा हुने गरेको छ । विशिष्ट व्यक्तिको सुरक्षामा कुनै कसर नछाड्ने प्रमाणित गर्न सिंगापुर प्रहरीका गोर्खाली सिपाहीहरू लागिपरेका छन् ।

ट्रम्प–किम शिखर वार्ताको उद्देश्य उत्तर कोरियाको आणविक निशस्त्रीकरण हो । आफ्नो मुलुकको सुरक्षा व्यवस्था चुस्त र दुरुन्त भएकै कारण ट्रम्प र किमबीचको वार्तास्थल बनेको सिंगापुरका विदेश मन्त्री भियिन बालकृष्णनको दाबी छ ।

अमेरिकाले नै पनि सिंगापुर प्रहरीको गोर्खाली युनिटलाई निडर र सक्षम तथा आतंकवादविरुद्ध प्रभावी योजना बनाउने एकाइ मान्दै आएको छ । सिंगापुर संसारको सुरक्षित शहरहरूको सूचीमा अग्रपंक्तिमा छ ।

सन् १९४९ देखि सिंगापुर प्रहरीमा नेपाली युवा भर्ति हुँदै आएका छन् । र, उनीहरूलाई संवेदनशील र विशिष्ट व्यक्तिहरूको सुरक्षा जिम्मा दिइँदै आएको छ ।

सन् २०१५ मा भएको विश्वभरका रक्षा मन्त्रीहरूको सम्मेलनको सुरक्षा जिम्मा पनि गोर्खा प्रहरीलाई दिइएको थियो । त्यसक्रममा एक चालकको आत्मघाती आक्रमणको योजना विफल तुल्याएको थियो, गोर्खा प्रहरीले ।

वार्तास्थलको सुरक्षाका लागि गोर्खा प्रहरीको कमान्डमा पाँच हजारभन्दा बढी प्रहरी परिचालन गरिएको सिंगापुरका गृहमन्त्री के. सानमुगमले संवाददाताहरूलाई जानकारी दिएका छन् । गोर्खा प्रहरी अत्यन्तै सक्षम रहेको उनको भनाइ छ ।

मन्त्री सानमुगमका अनुसार गोर्खा प्रहरीले २४सै घण्टा वार्तास्थलको सुरक्षा दिनेछ । ३७ वर्ष बेलायती सेनामा काम गरेका कृष्णकुमार आलेले यो जिम्मेवारीले समग्र गोर्खालीको गौरव बढाएको बताए ।
(एजेन्सीहरूको सहयोगमा)