रामचन्द्रले सुनाए घोर्ली बाख्रो हराएको कथा !

काठमाडौं- पार्टी सभापति शेरबहादुर देउवाविरुद्ध मोर्चाबन्दी सार्वजनिक गरेका कांग्रेसका वरिष्ठ नेता रामचन्द्र पौडेलले सोमबार खोरबाट घोर्ली बाख्रो हराएको उखानलाई एक तीर दुई निशाना बनाए ।

उनको तीर ‘पार्टी सभापति देउवाको नालायकीपना’ र ‘प्रधानमन्त्री केपी ओलीको अधिनायकवादी बाटो’ दुवैतिर सोझिएको थियो ।

प्रधानमन्त्री ओलीले संसद्मा प्रतिपक्षी दल नै नरहेको भनेर अभिव्यक्ति दिएकै भोलिपल्ट सरकारको नीति तथा कार्यक्रमलाई कांग्रेसले मौन समर्थन गर्नु गल्ती भएको पौडेलले औंल्याए । अनि, दुई तिहाइको सरकार बनाउन दुई कम्युनिस्ट पार्टी एक हुनु र मधेशकेन्द्रित दलका नेता उपेन्द्र यादवलाई ल्याउन मरिहत्ते गर्नु संयोग मात्र हुन नसक्ने बताए ।

‘जंगलमा बाघ कराउनु र खोरबाट घोर्ली बाख्रो हराउनु संयोग मात्र हुन सक्दैन,’ पौडेलले भने, ‘कांग्रेस नेतृत्वको कमजोरी र दुई तिहाइ पुर्‍याएरै छाड्ने कम्युनिस्टहरूको गतिविधिलाई कसरी संयोग मान्न सकिन्छ ?’

उनले थपे, ‘नत्र, प्रचण्डजीले पोखरा पुगेर अब कार्यकारी राष्ट्रपति चाहियो भनेर किन भन्नुपर्‍यो ?’

कांग्रेसलाई पार्टीभित्र र बाहिर दुवैतिरबाट घेराबन्दीमा पार्ने काम भइरहेको पौडेलको दाबी थियो । ‘पैसाको खोलो बगाउने काम भयो,’ उनले भने, ‘अब कांग्रेसले विगतमा गरेको गल्ती सुधार्दै कर्मशील बाटोमा नलागे अस्तित्वमाथि नै चुनौती आउनेछ ।’

पूर्वमहामन्त्री प्रकाशमान सिंहले पार्टीको वर्तमान नेतृत्व र भताभुंग भएको संगठनले दुई वटा पार्टी मिलेर बनेको सत्तारुढ दलसँग प्रतिस्पर्धा गर्न नसक्ने बताए । कम्युनिस्ट पार्टीको आधारभूत चरित्र नै अधिनायकवाद भएकाले वर्तमान सरकारको गलत कार्यको प्रतिरोध गर्न नेविसंघलाई उनले निर्देशन दिए ।

पूर्वमहामन्त्री कृष्णप्रसाद सिटौलाले वर्तमान सरकारले राज्य संयन्त्रलाई कमजोर बनाउन अनेकौं चालबाजी गरिरहेको बताए । कम्युनिस्टहरूको अधिनायकवादविरुद्ध लड्न कांग्रेसलाई सदन र सडकको मैदान खाली भएको उनको भनाइ थियो ।

सिटौलाले भने, ‘कांग्रेस कमजोर भएको छैन । अब विद्यार्थीले सडक तताउनुको विकल्प छैन ।’

पूर्वसह-महामन्त्री अर्जुननरसिंह केसीले वर्तमान सरकारको नेतृत्वबाट लोकतन्त्रको संरक्षण सम्भव नभएको बताए । वर्तमान सरकारले ४० प्रतिशतसम्म मूल्यवृद्धि गरेको र आगामी पाँच वर्षसम्म लगानी गर्नेको सम्पत्तिको स्रोत नखोज्ने भनेर लिएको निर्णयले कालोबजारी गर्नेहरूलाई संरक्षण दिएको बताए । सिंहले भने, ‘सरकार साँच्चैको भ्रष्टाचारविरोधी हो भने सुनकाण्डको छानविन गहिराइमा गएर गर्न चुनौती दिन्छु ।’

युवा नेता प्रदीप पौडेलले प्रधानमन्त्री ओली राति दुई बजेसम्म नसुत्ने गरेको सूचना गम्भीर भएको बताए । उनले भने, ‘कांग्रेसलाई गाली गर्न शब्द र उखान तुक्का खोज्नका लागि समय खेर फालिरहनुभएको छ ।’

सरकारले ल्याएको नीति तथा कार्यक्रमलाई कांग्रेस नेतृत्वले थप्पडी बजाएर अनुमोदन गर्दै सरकारलाई निरंकुश बन्न मौका दिएको आरोप पौडेलले लगाए ।