प्रहरी इन्काउन्टरमा घाइते भएका 'गुण्डा' लामा ट्रमा सेन्टरमा

काठमाडौं- महानगरीय प्रहरी अपराध महाशाखाको टोलीले ललितपुरको यूएन पार्कमा एक युवकमाथि गोली चलाएको छ ।

गोली लागेर काभ्रेली समुहको नाममा गुन्डागर्दी गर्दै आएका दावा लामाका सहयोगी अशोक लामा घाइते भएका छन् । घुँडामुनि गोली लागेका उनलाई उपचारका लागि ट्रमा सेन्टरमा भर्ना गरिएको छ। लामा गुण्डा नाइके भएको महानगरीय अपराध महाशाखाका प्रहरी उपरीक्षक नरेन्द्र उप्रेतीले बताएका छन् ।

उजुरीको आधारमा माहानगरीय अपराध महाशाखाको टोलीले अपरेसन सुरु गरेको  थियो । प्रहरीले नियन्त्रणमा लिन खोज्दा प्रहरीमाथी नै गोली प्रहार गरेपछि जवाफी फायर गर्नुपरको महाशाखाले जनाएको छ ।

ललितपुर गिम्दी-८ का ३८ वर्षीय लामाले समूह खडा गरी सातदोबाटो र भैंसेपाटी क्षेत्रका घरजग्गा, क्रसर र निर्माण व्यवसायीहरूसँग धम्क्याउँदै रकम असुल्ने गरेको अपराध महाशाखाले जनाएको छ। प्रहरी टोलीले यूएन पार्कनजिक बसिरहेको फेला पारेर खानतलासी गर्दा फायर खोलेपछि आत्मरक्षाका लागि उनीमाथि गोली चलाउनुपरेको महाशाखाको विज्ञप्तिमा उल्लेख छ ।

उनको दायाँ खुट्टामा गोली लागेको छ । घटनास्थलबाट एक थान पेस्तोल र दुई राउन्ड गोली बरामद महाशाखाले जनाएको छ ।