छाउगोठमा सर्पले डस्दा किशोरीको मृत्यु

धनगढी : छाउगोठमा सुतेकी १८ वर्षकी किशोरी पार्वती बुढाको मृत्यु भएको छ । महिनावारी भएकी अछामको तुर्माखाँद गाउँपालिका–४ जया गाउँकी पार्वतीलाई शनिबार राति सर्पले डसेको थियो ।

छाउ गोठमा सुतेकी उनको दायाँ हातको औलामा सर्पले डसेको थियो । पार्वती घरबाट तल बेसीको छाउगोठमा थिइन । साथी राधिका बुढासँगै गोठमा सुतिरहेको बेला छाना रहेको सर्प पार्वतीको शरीरमा खसेको र औलामा टोकेको राधिकाले जानकारी दिइन् । परिवारका अन्य सदस्य गाउँको घरमा रहेकोले ढिलो गरी मात्र खबर बाहिर आउँदा उपचारको अभावमा उनको ज्यान गएको हो ।

पार्वती विश्वज्योती माविमा कक्षा १० मा अध्ययनरत थिइन । उनकी दिदी प्रेमकला बुढाका हिउँदयाममा केहि परिवार बेसीतिर गाईबस्तुसहित छानामा बस्ने गर्दछन् । नजिकै महिनावारी भएको बेला सुत्ने गोठ पनि निर्माण गरिएको हुन्छ ।

उनीसँगै रहेकी साथी राधिकाले पार्वतीको महिनावारी भएको शनिबार चार दिन थियो भन्ने जानकारी दिए पनि तुर्माखाँद–४ का वडाअध्यक्ष कविराम बुढाले भने पार्वती छाउगोठमा नभई भाइबहिनीसँग सुतेको बताए ।

छानामा सुतेका बेला सर्पले टोकेको भन्ने मात्र खबर आफूकहाँ आएको उनले बताए । तुर्माखाँद गाउपालिकाकी उपप्रमुख अम्रिता बुढाले आफू काठमाडौं रहेको र यो घटनाबारे आफूलाई धेरै जानकारी नभएको बताइन ।

गत पुसमा मात्र सोहि गाउँपालिका वडा नम्बर ३ भैरवस्थानको लकान्द्रा की २२ वर्षकी गौरी बुढाको पनि छाउपडी गोठमा एक्लै सुतिराखेको अवस्थामा ज्यान गएको थियो ।

छाउपडी गोठमा सुतेको अवस्थामा अछाममा बर्षेनी किशोरी तथा महिलाले ज्यान गुमाईरहेका छन् ।