प्रदेश २ मा अक्सिजन अभाव हुन नदिन मन्त्रीको संयोजकत्वमा समिति गठन

जनकपुरधाम– कोरोना संक्रमितको उपचारमा अक्सिजनको अभाव भइरहेको समयमा प्रदेश २ सरकारले एक मन्त्रीको संयोजकत्वमा अक्सिजन ग्यास अनुगमन व्यवस्थापन समिति गठन गरेको छ।

प्रादेशिक कोभिड संकट व्यवस्थापन समितिको मंगलबार बसेको बैठकबाट आन्तरिक मामिला तथा कानुन मन्त्री ज्ञानेन्द्र यादवको नेतृत्वमा अक्सिजन ग्यास अनुगमन व्यवस्थापन समिति गठन गरेको हो। 

अस्पतालहरुमा अक्सिजनको अभाव हुन नदिनका लागि मन्त्री यादवको संयोजकत्वमा समिति गठन गरिएको बताइएको छ। उक्त समितिले प्रदेशभित्रका अक्सिजन उद्योगबाट दैनिक उत्पादन हुने संख्या र वितरण प्रणालीको अनुगमन नियमित गर्नेछ। 

बैठकबाट कोरोना संक्रमितहरुको उपचारमा लागेको प्रदेशका सरकारी तथा निजी अस्पतालहरुको अनुगमनका लागि मधेश स्वास्थ्य विज्ञान प्रतिष्ठानका उपकुलपति डा. राम केवल साहको संयोजकत्वमा विज्ञ समूह गठनसमेत गरेको छ। उक्त समितिले प्रदेश भित्रका अस्पतालहरुको अनुगमन निरीक्षण गर्नुका साथै अस्पतालहरुलाई दिनुपर्ने सुविधाका सम्बन्धमा प्रदेश सरकारलाई सल्लाह सुझाव दिनेछ।

आवश्यक्ताअनुसार निजी अस्पतालहरुमा कोरोना संक्रमितहरुको उपचारको व्यवस्था मिलाउनका लागी आइएमओ गर्न प्रदेश सरकारमा सिफारिस गर्ने क्षेत्राधिकार समेत दिइएको छ।