शहरी विकास आयोजना- व्यवसायीलाई अर्बौंको क्षति

जनकपुरधाम- यहाँ सञ्चालित एकीकृत शहरी विकास आयोजना फेब्रुअरी २०१८ मै सकिनुपर्ने सम्झौता छ । थपिएको जुन २०१८ को म्याद पनि सकिँदैछ, निर्माण सकिने टुंगो छैन । 

उक्त आयोजनाका लागि एसियाली विकास बैंक (एडीबी)ले एक अर्ब रुपैयाँ ऋण उपलब्ध गराएको छ । १ वैशाख ०७३ मा योजना उद्घाटन भएको थियो । त्यसअन्तर्गत् नौ दशमलव दुई किलोमिटर सडक र ३२ किमि ढल निर्माण गर्ने सम्झौता छ । 

काम सम्पन्न हुने लक्षण नदेखिएपछि आगामी डिसेम्बरसम्म म्याद थप्ने तयारी भइरहेको छ । 

हालसम्म ६ किमि सडक निर्माण पूरा भएको छ । बाँकी तीनमध्ये दुई किमि सडक बजार क्षेत्रमा पर्छ । मापदण्डअनुसार घरटहरा भत्काउन ढिलाइ भएकाले उक्त खण्डको निर्माण समयमै पूरा हुने सम्भावना न्यून रहेको आयोजना प्रमुख गंगाप्रसाद यादव बताउँछन् । 

यस्तै, ढलको ३२ किमिमध्ये १८ किमि मात्र पूरा भएको छ । सडक र ढलबाहेक सडकछेउमा पेटी निर्माण अझै शुरु हुन सकेको छैन । 'कामको गतिलाई तीव्रता दिएका छौं,' आयोजना प्रमुख यादव भन्छन् । 

उनका अनुसार उक्त आयोजनाका लागि हालसम्म ६० करोड रुपैयाँ भुक्तानी भइसकेको छ । 

थपिएको म्यादमा पनि सडक र ढल निर्माण पूरा भएन, फेरि अवधि बढाउने तयारी ।

फोहोर व्यवस्थापनका लागि जग्गा उपलब्ध भइसक्दा पनि उपमहानगरले निर्माण थाल्न सकेको छैन । जनकपुर–१९ भोइलमा गुठी संस्थानले ल्यान्डफिल साइट निर्माण गर्न उपमहानगरलाई भाडामा जग्गा उपलब्ध गराएको छ ।

त्यसबाहेक सघन शहरी विकास कार्यक्रमअन्तर्गत् नगर क्षेत्रमा १७ किमि सडक निर्माण जारी छ । ८३ करोड लागतको उक्त कार्यक्रमको गति पनि सुस्त छ, जसका लागि हालसम्म ३० करोड रुपैयाँ निकासा भइसकेको छ । 

'कमसल सामग्रीको प्रयोग'

एकीकृत शहरी विकास आयोजनाअन्तर्गत् भइरहेको निर्माणमा कमसल सामग्रीको प्रयोग भइरहेको स्थानीय बासिन्दाको आरोप छ । ठेकेदार कम्पनी बलराम कन्स्ट्रक्सनले कमसल इँटा प्रयोग गरिरहेको उनीहरू बताउँछन् । 

बालुवा, सिमेन्टलगायत निर्माण सामग्री पनि गुणस्तरीय नरहेको जनकपुर–४ का वडाध्यक्ष सुदर्शन सिंहको आरोप छ । त्यसबारे उपमहानगर र आयोजना कार्यालयलाई पटक–पटक जानकारी गराउँदासमेत सुनवाइ नभएको उनी बताउँछन् । 

सडक निर्माणमा भइरहेको ढिलाइका कारण अर्बौंको क्षति बेहोर्नुपरेको स्थानीय व्यवसायीहरू बताउँछन् । घरहरू भत्काइँदा र सडक निर्माणमा भइरहेको ढिलाइको दोहोरो मारमा व्यवासायीहरू परेको जनकपुर उद्योग वाणिज्य संघका अध्यक्ष ललितकुमार साहको भनाइ छ ।