विप्लवका कार्यकर्ता समाउन खोज्दा प्रहरी घाइते

चितवन- विप्लव नेतृत्वको नेकपाका कार्यकर्ता पक्राउ गर्न खोज्दा एक प्रहरी जवान घाइते भएका छन् । 

चितवन जिल्ला इन्चार्ज लालबहादुर बिसीलाई पक्राउ गर्ने क्रममा प्रतिरोध हुँदा प्रहरी जवान इसु मियाँ धोबी घाइते भएका हुन । धोबीको टाउकामा चोट लागेको प्रहरीले जनाएको छ । उनको पुरानो मेडिकल कलेजमा उपचार भइरहेको छ ।

जिल्ला प्रहरी कार्यालय चितवनको टोलीले शनिबार राति भरतपुर महानगरपालिका–९ मा बिसीलाई पक्राउ गर्न खोज्दा बिसी र उनका अंगरक्षकले इँट्टा र ढुङ्गा प्रहार गरेको प्रहरीले जनाएको छ ।

प्रमुख जिल्ला अधिकारी जितेन्द्र बस्नेतका अनुसार बिसीका अंगरक्षकले इँट्टा प्रहार गरेपछि बिसी भाग्न सफल भएको र प्रहरी जवान घाइते भएको बताए । बिसी भागे पनि उनका अंगरक्षक वीरबहादुर तामाङलाई पक्राउ गरिएको प्रहरीले जनाएको छ ।