लापरबाहीले संक्रमितकाे मृत्यु भएकाे आरोपपछि भक्तपुर इन्टरनेसनल अस्पताललाई प्रशासनको पत्र

भक्तपुर - मध्यपुर थिमि-३, कौशलटारस्थित भक्तपुर इन्टरनेसनल अस्पताललाई कारबाही गर्न जिल्ला प्रशासन कार्यालयले आइतबार पत्र पठाएको छ।

अस्पतालको गम्भीर लापरबाहीका कारण दुई कोरोना संक्रमितको मृत्यु भएको र स्वीकृतभन्दा बढी बिरामी भर्ना गरेको सम्बन्धमा कारबाही गर्न प्रशासनले सो अस्पताललाई पत्र पठाएको हो।    

भक्तपुरका सहायक प्रमुख जिल्ला अधिकारी मुकेशकुमार केशरीले आइतबार अस्पताललाई स्पष्टीकरणको पत्र पठाएको जानकारी दिए। ‘कारबाहीको प्रक्रिया सुरु गरेका छौं, त्यसका लागि अस्पताललाई पत्र पठाएका छौं’, उनले भने। 

उनले अनुसन्धानका धेरै पाटो अहिले नै खुलाउन नमिल्ने जानकारी दिँदै अस्पताललाई पत्र पठाएको स्पष्ट पारे। उनले पत्रको जवाफ आएपछि थप प्रक्रिया अघि बढ्ने बताए। 

१५ शय्याको स्वीकृति पाएको सो अस्पतालले क्षमताभन्दा दोब्बर बिरामी भर्ना लिएको थियो। स्रोतका अनुसार सो अस्पतालमा बिहीबार साँझ २८ कोरोना संक्रमितलाई भर्ना लिइएको थियो। 

दिउँसोदेखि नै अक्सिजन अभाव झेलेको अस्पतालले समयमा अक्सिजनको व्यवस्था गर्न नसकेपछि राति आईसीयू र भेन्टिलेटरमा उपचार गराइरहेका बिरामीलाई समेत निकालेर अन्यत्र लैजान बिरामीका आफन्तलाई दबाब दिएको बताइएको छ। 

सोही क्रममा अक्सिजन नहुँदा भेन्टिलेटरमा उपचाररत कोरोना सङ्क्रमित भक्तपुर कमलविनायकका ४५ वर्षीय पुरुषको सोही अस्पतालमा मृत्यु भएको थियो भने अस्पतालले अन्यत्र लैजानु भन्दै आईसीयूबाट बाहिर निकालेका पोखरा स्थायी घर भएका ६० वर्षीय पुरुषको अल्का अस्पताल लैजाँदै गर्दा बाटोमा मृत्यु भएको थियो। 

सो अस्पतालले बिरामीलाई रिफरको कागजपत्र नदिई जबरजस्ती अन्यत्र लैजान भन्दै बिरामीलाई आईसीयूबाहिर निकालेको मृतकका आफन्तको आरोप छ। रासस