पर्सामा संक्रमितको घरघरमै निःशुल्क खाना

पर्सा- वीरगंजमा ‘सानो पाइला’ नामक संस्थाले कोरोना संक्रमितहरुको घरघरमै निःशुल्क खाना पुर्‍याउन सुरु गरेको छ। 

विश्व स्वास्थ्य संगठनले निर्धारण गरेको मापदण्डबमोजिम पौष्टिक खाना संक्रमितको साथै निषेध आदेशमा खाना पाउन मुस्किल परेका परिवारलाई उपलब्ध गराउने उद्देश्यले दिनको दुई पटक घरघरमा खाना पुर्‍याइरहेको संस्थाका सञ्चालन प्रमुख जय साहले बताए। 

पहिलो चरणको कोरोना महामारीमा सानो पाइलाले १ लाख ५ हजार ५४६ जना व्यक्तिलाई खाना खुवाएको थियो। साथै आइसोलेसन निर्माण गरेर संक्रमितहरुलाई निशुल्क रुपमा आइसोलेसन प्रदान गरेको थियो। 

दोस्रो चरणको महामारीमा वीरगंजमा प्रत्येक दिन संक्रमित तथा उपचार नपाएर मृत्युको संख्या बढ्दै गएपछि कतिपय संक्रमितको सबै परिवार नै खाना पकाउन र निषेध आदेशमा मगाउन नसक्ने अवस्थामा पुगेकाले यो अभियान सुरु गरिएको सांस्थाका प्रमुख साहले बताए।

पहिलोपटक वीरगंज र प्रदेश नम्बर २ का विभिन्न जिल्लाहरुमा खाना खुवाउने र काठमाडौंमा समेत खाना खुवाउने योजना अगाडि बढाइएको उनले जानकारी दिए।

हाल वीरगंजका लागि मोबाइल नम्बर ९८२४२४४१३९ मा सम्पर्क गरी भनेको स्थानमा संस्थाका ८० जना भोलेन्टियरको सहयोगमा आज बिहानै २५० जना बढी परिवारलाई खाना खुवाइएको संस्थाले जनाएको छ। संस्थाले खानामा अण्डा, गेडागुडी, हप्तामा एकदिन मासु, फलफूल, विभिन्न तरकारी दिने जनाएको छ।