एनएसएलमा अपराजित यात्रा कायम गर्ला बुटवल लुम्बिनीले ?

काठमाडौं– जारी नेपाल सुपर लिग (एनएसएल)मा अपराजित यात्रा कायम राख्ने एकमात्र टिम हो बुटवल लुम्बिनी। उसले आजको खेलमा उपाधि दावेदार मानिएको काठमाडौं रेजर्सको सामना गर्दैछ।

प्रतियोगितामा निरन्तर उत्कृष्ट प्रदर्शन गरिरहेको काठमाडौंलाई औसत तर दिगो किसिमको प्रदर्शन गरिरहेको बुटवल लुम्बिनी कठिन प्रतिद्वन्दी अवश्य हो। बुटवलको अपराजित यात्राले पनि उसका खेलाडीमा मनोबल बढाएको छ।

यता रणनीति बनाउनमा खप्पिस र राष्ट्रिय टिमसमेत सम्हालिसकेका प्रशिक्षक बालगोपाल महर्जनको टिम उत्तिकै सफल छ। यद्यपि उसले धनगढीसँग ३–० गोलको हार भने बेहोरिसकेको छ। त्यसपछि काठमाडौंले पोखरासँग गोलरहित बराबरी पनि खेलिसकेको छ। बुटवलले अहिलेसम्म तीन खेलमा एक जित र दुई बराबरी खेलिसकेको। सो खेलबाट उसले पाँच अंक बनाएको छ।

यदि आजको खेलमा जित निकाले बुटवल शीर्षस्थानमा जानेछ। यता काठमाडौंले तीन खेलबाट एक हार, एक जित र एक बराबरीसँगै चार अंक बनाएको छ।

उसले आजको खेलमा जित निकाल्न सके सात अंक बनाउने छ। साथै गोलअन्तरमा अघि आउन सके शीर्षस्थानमा जानेछ। र, खेल बराबरीमा रोकिए बुटवल लुम्बिनी चौथो र काठमाडौं छैटौं स्थानमा कायम रहनेछ। त्यसैले आजको जित दुवै टिमका लागि महत्वपूर्ण छ। यसले दुवै टिमलाई प्ले अफमा सरल यात्रा गर्नका लागि फाइदा हुनेछ।

आजको खेलमा बुटवलका विदेशी खेलाडी ओमोलाजा करिम र आशिष लामा केन्द्रमा रहनेछन्। त्यस्तै काठमाडौंका मेसुके ओलुमोउ पनि केन्द्रमा रहने छन्। उनीहरुले जारी लिगमा राम्रो प्रदर्शन गर्दै आइरहेका छन्।