संसद्‌भित्रै मञ्‍जुले सांसद् कमललाई झापड हानिन्

जनकपुरधाम- प्रदेश २ का नेकपाका एक सांसदले आफ्नै दलको सांसदलाई झापड हानेका छन् । 

मंगलबार प्रदेशसभाको बैठक सकिए लगतै संसदीय दलको कार्यालयमा बसेको बैठकमा तत्कालीन एमालेका समानुपातिक सांसद मञ्जु यादवले धनुषा १ (क) बाट निर्वाचित सांसद किशोरी साह कमललाई झापड प्रहार गरेको हो ।

दलको कार्यालयमा योजना टाइप गर्ने विषयमा विवाद हुँदा यादवले आफ्नै पार्टीका सांसद साहलाई झापड हानेका थिइन । कम्युटर अपरेटरसँग सांसद यादवको विवाद भइरहँदा सांसद साहले प्रतिवाद गरेका थिए । सोहि क्रममा यादवले सांसद साह माथि झापड हानेको बताइएको छ ।

यद्यपी सांसद यादवले सामान्य विवाद मात्र भएपनि झापड भने नहानेको प्रतिक्रिया दिएकी छिन् । नेपाल समयसँग कुरा गर्दै सांसद यादवले मान सम्मान र स्वभिमानको साम्मुने पैसाको बढी महत्व नरेहेको भन्दै घुमाउरो प्रतिक्रिया दिएकी छिन् । यस विषयमा सांसद साहको प्रतिक्रिया लिने प्रयासगर्दा उनको फोन उठेन ।

यता घटना भएको बेला संसदीय दलको कार्यालयमै उपस्थित तत्कालीन नेकपा एमाले संसदीय दलका नेता सत्यनारायण मण्डलले सांसद यादवको मानसिक स्थिति बिग्रेको प्रतिक्रिया दिए । सांसद यादव अनुशासनमा बस्न नमानेर अराजक बन्ने प्रयास गरेको बताएपनि मण्डलले हातपात नभएको दाबी गरे ।