१० राजदूतलाई यसकारण फिर्ता बोलाउँदै सरकार

काठमाडौं- सरकारले कांग्रेस, राप्रपा र तत्कालीन फोरम लोकतान्त्रिकको कोटाबाट नियुक्त भएका सबै राजदूत फिर्ता बोलाउने तयारी थालेको छ । माओवादी कोटाबाट नियुक्त भएकाहरू भने यथावत् रहने भएका छन् । 

तत्कालीन एमाले र माओवादी गठबन्धनको अघिल्लो सरकारले नियुक्त गरेका १४ राजदूत शेरबहादुर देउवा नेतृत्वको सरकारले बदर गरेको थियो । र, उनीहरूका ठाउँमा नयाँ राजदूत पठाएको थियो । 

स्रोतका अनुसार स्थायी सरकार बन्ने अवस्थामा राप्रपा र कांग्रेसको कोटामा नियुक्त भएका राजदूतबाट सरकारको वास्तविक कार्यक्रम लागू हुन नसक्ने बताउँदै फिर्ता बोलाउन लागिएको हो।

स्रोतका अनुसार इज्जतसाथ फिर्ता आउन सरकारले १० राजदूतलाई अनौपचारिक सन्देश पठाइसकेको छ। तर, उनीहरूले अटेर गरिरहेको स्रोतले जनाएको छ । प्रधानमन्त्री केपी ओलीको चीन भ्रमणलगत्तै उनीहरूलाई फिर्ता बोलाउने सरकारी तयारी छ ।
 

दक्षिणकोरियाका अर्जुनजंगबहादुर सिंह, म्यानमारका भीम उदास, बंगलादेशका चोपलाल भुसाल, श्रीलंकाका विश्वम्भर प्याकुरेल, कतारका रमेशप्रसाद कोइराला र संयुक्त अरब इमिरेट्सकी आशा लामालाई स्वदेश फर्काउन लागिएको हो ।

यस्तै, राप्रपाको कोटामा जापानमा राजदूत बनेकी प्रतिभा राणा, स्पेनका भरत रायमाझी र इजरायलका निरञ्जन थापालाई पनि फिर्ता बोलाइने भएको छ । विजयकुमार गच्छदार नेतृत्वको तत्कालीन फोरम लोकतान्त्रिकको कोटामा ओमनको राजदूत बनेकी शर्मिला पराजुली पनि फिर्ता बोलाउने सूचीमा छिन् ।