नेपाल सुपर लिग : पहिलो जित निकाल्ला त ललितपुरले ?

काठमाडौं - उत्कृष्ट प्रदर्शन गरिरहेकाे तर जितविहीन टिम हो ललितपुर सिटी फुटबल क्लब। उसले जारी फ्रेन्चाइज नेपाल सुपर लिग (एनएसएल)मा एउटा पनि जित निकालेको छैन।

आज त्यही ललितपुर जितको खोजीमा पोखरा थन्डर्स क्लबविरुद्ध मैदानमा उत्रिँदैछ। दशरथ रंगशालामा आइतबार साँझ साढे ५ बजेबाट सुरु हुने खेलमा पोखरा लगातार दोस्रो जितको खोजीमा रहँदा ललितपुर पहिलो जित निकाल्ने दाउमा हुनेछ।

पछिल्लो खेलमा पनि बराबरी खेलेपछि लिग तालिकाको पुछारमा रहेको ललितपुरको प्रशिक्षक प्रदीप हुमागाईंले बाँकी तिनै खेलमा जित निकाल्ने आशा व्यक्त गरेका थिए।

उनका अनुसार ललितपुरमा अझै शीर्ष चारमा पुग्ने आशा कायमै छ। यो भनेको अब उसको लगातार तीन जित हो। यता पहिलो खेलमा हार बेहोरे पनि दोस्रो र तेस्राे खेल सुधार गर्दै आएको पोखरा आज चाैथाे खेल खेल्दै छ।

ऊ पनि आजको खेलमा जित निकाल्दै शीर्षस्थानमा जाने दाउमा रहने छ। पोखराले तेस्रो खेलमा काठमाडौं रेजर्ससँग गोलरहित बराबरी खेलेर चार अंक बनाएको थियो। ललितपुरको दुई अंक मात्र छ। 

धनगढीसँग शनिबारको खेलमा तीन गोल बेहोरेको चितवन अंक तालिकाको पुछारमा पुगेकाले ललितपुर छैटौं स्थानमा छ।