धनगढी रकम लुटपाट प्रकरणका मुख्य योजनाकारसहित पाँच सार्वजनिक

धनगढी- कैलालीको धनगढीमा १३ जेठमा गोली प्रहार गरी साढे नौ लाख लुट्ने कार्यमा संलग्नसहित लुटिएको रकम र पेस्तोल प्रहरीले मंगलबार सार्वजनिक गरेको छ। 

प्रहरीले पत्रकार सम्मेलनको गरी घटनाका मुख्य योजनाकार, गोली हान्ने व्यक्ति, रकम बोक्ने तथा राख्न सहयोग गर्नेलार्इ सार्वजनिक गरेको हो ।

घटनाका मुख्य योजनाकार धनगढी-६ का ३१ वर्षीय राजकुमार चौधरी भएको प्रहरीले जनाएको छ। उनलाई धनगढीबाटै प्रहरीले पक्राउ गरिएको हो। उनको साथबाट तीन लाख ६३ हजार रुपैयाँसमेत बरामद गरिएको प्रहरीले जनाएको छ । 

प्रहरीका अनुसार घटनाको योजना बनाउने तथा हतियार र मोटरसाइकल व्यवस्था गर्ने पनि चौधरी नै हुन्। ०६५ सालमा उनी हातहतियार खरखजाना मुद्दामा ७५ दिन कैलाली कारागार बसेका थिए । 
गोली हान्ने कञ्चनपुर बेलौरी ६ का ३० वर्षीय उग्रसेन राना पनि उनकै गाउँबाट पक्राउ परेका हुन् । आफैंले मोटरसाइकल चलाएको र गोली हानेको प्रहरीलाई बयान दिएका छन् । उनको साथबाट पेस्तोल, मोटरसाइकल र एक लाख ९० हजार रुपैयाँ बरामद गरिएको हो । 

उनी हातहतियार खरखजाना तथा विभिन्न चोरीका मुद्दामा चार वर्ष कञ्चनपुर कारागारमा सजायँ भोगी ०७१ सालमा छुटेका थिए । 

कञ्चनपुर कृष्णपुर ६ का २७ वर्षीय कल्लु राना मोटरसाइकलको पछाडि बसेर पैसाको झोला लुट्ने कार्यमा संलग्न रहेको प्रहरीले जनाएको छ । उनको साथबाट १५ हजार ६ सय रुपैयाँ बरामद गरिएको छ । उनी जबर्जस्तिकरणी मुद्दामा ६ वर्ष कारागार सजाय भोगेर माघ ०७४ मा छुटेका थिए । 

प्रहरीले सहयोगीका रूपमा अन्य दुई जना पनि नियन्त्रणमा लिएको छ । धनगढी १३ का २८ वर्षीय रामप्रवेश राना तथा धनगढी ६ का १८ वर्षीय बिरु चौधरी घरबाटै पक्राउ परेका हुन् । सिद्धार्थ बैंकबाट रकम लगेर आईएमईमा जाने क्रममा धनगढी ३ का निर्मल कार्कीमाथि गोली प्रहार भएको थियो । 

यसरी बन्यो योजना

घटनाका मुख्य योजनाकार राजकुमार चौधरीले आर्थिक कारोबार भइरहने आईएमर्इ सेन्टरबाट पैसा लुट्न सकिन्छ भनेर केही दिनदेखि त्यो क्षेत्रलाई 'रेकी' गरेको प्रहरीले जनाएको छ । मुख्य योजनाकार राजकुमारले गोली हान्ने उग्रसेन र मोटरसाइकलको पछाडि बसेर पैसाको झोला बोक्ने कल्लु रानालाई २\३ दिनदेखि आईएमईमा कसले कुन बैंकबाट पैसा ल्याउने-लैजाने गर्छ भनेर गतिबिधि बुझ्न लगाएको अनुसन्धानबाट खुलेको छ । 

आईएमई सेन्टरमा कार्यरत कार्कीले नै बैंकबाट पैसा ल्याउने र लैजाने गरेको यकिन गरेपछि बैंकबाट निस्किएलगत्तै सडकमा गोली हानिएको हो । योजनाकार राजकुमार र अन्य संलग्नहरूको यसअघि कारागारमै भएको चिनजानका आधारमा उनीहरूले संगठित अपराध गर्दै आएको अनुसन्धानका क्रममा खुलेको छ । 

यसरी सफल भयो प्रहरी

घटनाको नौ दिनपछि संलग्न सबैलाई पक्राउ गर्न सफल भएको प्रहरीले त्यसमा प्रयोग गरिएको मोटरसाइकलको नम्बर नक्कली भएकाले सत्यतथ्य बाहिर ल्याउन केही ढिलो भएको जनाएको छ । 

मोटरसाइकलको नक्कली स्टिकर प्रयोग गरेर नम्बर लेखिएको र पछि उक्त स्टिकर हटाएर प्रयोग गरेको संघीय प्रहरी एकाइ प्रमुख एसएसपी हरिराज काफ्लेले पत्रकार सम्मेलनमा बताए । मोटरसाइकलमा प्रयोग भएको नम्बर देशका कुनै पनि यातायात कार्यालयमा दर्ता नभएको र मोटरसाइकलसमेत चोरीको हुन सक्ने देखिएको छ । 

प्रहरीले मुख्य योजनाकार राजकुमारलाई नियन्त्रणमा लिएपछि विस्तारै अन्य संलग्नहरूलाई पक्राउ गर्न सफल भएको हो । उनीहरू लामो समयदेखि आपराधिक समुहमा आबद्ध भएको खुलेको छ । 

जंगलमा रकम बाँडफाँट

प्रहरीका अनुसार धनगढी चौराहनजिक घटना भएलगत्तै मोटरसाइकलमा सवार उग्रसेन र कल्लु दुवै चौराहबाट चटकपुर हुँदै पश्चिमतिरको बाटोबाट मोहना नदी तरी कञ्चनपुर पुगेका थिए । घटनाको समयमा मुख्य योजनाकार राजकुमार पनि त्यही सेरोफेरोमा रहेको र पछि सबैको भेट कञ्चनपुरको लालझाडी जंगलमा भएको अनुसन्धानबाट खुलेको छ । लुटिएको रकम उनीहरूले सोही जंगलमा लगेर बाँडेका थिए । त्यसमध्येको केही खर्च गरिसकेका छन् ।