गोरेसँग किन सँगै बस्न मानेनन् एसएसपी खत्री ?

काठमाडौं- सुन तस्करी प्रकरणमा संलग्न चुडामणी उप्रेती (गोरे)सँग निलम्बित एसएसपी श्याम खत्री बस्न नमानेपछि छुट्टाछुट्टै कारागारमा राखिएको छ । खत्रीले कारागारमा गोरसँगै नराख्न प्रहरीलाई विशेष अनुरोध गरेपछि उनीहरुलाई अलग-अलगस्थानमा राखिएको हो । 

स्रोतका अनुसार सँगै बस्दा थपकुरा खुल्ने र समस्या पर्नसक्ने डरले खत्रीले गोरसँग नबसेर अलग्गै कारागार रोजेका हुन । 

तर, प्रहरीले भने, दुवै अभियुक्तलाई एकैठाउँ राख्दा सुरक्षा चुनौती बढ्ने भन्दै बेग्लाबेग्लै कारागारमा राखेको जनाएको छ । 

जिल्ला प्रहरी कार्यालय मोरङका प्रमुख एसपी मनोज कुमार केसीले नेपाल समयसँग कुराकानी गर्दै अनुसन्धानलाई प्रभावित नबनाउन र सुरक्षा चुनौतीलाई कम गर्न बेग्लाबेग्लै कारागार राखिएको बताए ।

जिल्ला अदालत मोरङमा आत्मसमर्पण गरेका खत्रीलाई बयानपछि सुनसरीको झुम्का कारागारमा पुर्‍याइएका छ भने, गोर जिल्ला कारागार मोरङमै छन् । 

सुन तस्करीको मुख्य आरोपीका रुपमा पक्राउ परेका गोरेले दिएको बयानमा आधारमा दोषी देखिएका एसएसपी खत्रीले मोरङ अदालत पुगेर आत्मसमर्पण गरेका थिए । 
खत्री र गोरेले कारागारमा पनि टाढा बस्न खोज्नुलाई अर्थपूर्ण रुपमा हेरिएको छ ।