प्रदेश २ : कर्मचारी संक्रमित भएपछि प्रदेशसभा बैठक अनिश्चितकालका लागि स्थगित 

जनकपुरधाम– कर्मचारीमा कोरोना संक्रमण भएपछि प्रदेशसभा बैठक अनिश्चितकालका लागि स्थगित गरिएको छ। प्रदेशसभा सचिवालयमा कार्यरत तीन कर्मचारीमा कोरोना संक्रमण भएकै कारण प्रदेशसभा बैठक स्थगित गरिएको हो। 

प्रदेशको नाम तथा राजधानीका विषयमा मंगलबार ११ बजेका लागि बोलाइएको बैठक कर्मचारीमा कोरोना संक्रमण देखिएकाले बस्न नसकेको प्रदेशसभा सचिवालयका सचिव रन्जितकुमार यादवले जानकारी दिए।

६ महिनापछि गत चैत ३० गते प्रदेशसभा बैठक बसेको थियो। त्यसपछि वैशाख १० गते बसेको प्रदेशसभा बैठक वैशाख १२ गते बोलाइए पनि त्यसयता बस्न सकेको छैन।

वैशाख १२ गते दिनको ११ बजे बोलाइएको प्रदेशसभा बैठकसमेत कर्मचारीमा कोरोना संक्रमण पुष्टि भए बैठकको समय एक दिन सारिएको थियो। त्यस दिन पनि बैठक बस्न नसकेपछि मंगलबार बिहान ११ बजेका लागि प्रदेशसभा बैठक डाकिएको थियो।

कोरोना संक्रमण जोखिमका कारण बैठक अनिश्चितकालका लागि स्थगित गर्नुपरेको सचिव यादवले बताए।