चितवन र ललितपुरको बराबरीसँगै सकियो सुपर लिगको पहिलो चरण

काठमाडौं- नेपाल सुपर लिगको पहिलो खेलमा चितवन फुटबल क्लबले ललितपुर सिटी क्लबसँग बराबरी खेलेको छ।

त्रिपुरेश्वरस्थित दशरथ रंगशालामा भएको खेलमा निरन्तर दबाब बनाएको ललितपुर चितवनसँग १-१ गोलको बराबरीमा रोकिएको हो।

खेलको पहिलो हाफमा ललितपुरले पेनाल्टी गुमाउँदा अग्रता बनाउनबाट चुकेको थियो। २१ औं मिनेटमा पेनाल्टीको अवसर पाए पनि अन्जन विष्टले प्रहार गरेको पेनाल्टी चितवनका गोलकिपर विशाल सुनारले बचाउ गरेका थिए।

रिबाउन्ड भएको बलमा गरिएको प्रहार पनि सुनारले उत्कृष्ट बचाउ गरेका थिए। बाँकी समयमा पनि दुवै टिमले गोल गर्न नसकेपछि पहिलो हाफ गोलरहीत बराबरीमा रोकिएको थियो।

तर दोस्रो हाफको ४९ औं मिनेटमै डिफेन्डर कमल श्रेष्ठले गोल गरेपछि ललितपुरले खेलमा अग्रता बनाएको थियो। त्यसलगत्तै फरवार्ड नुर्लान जाहिदले आकर्षक प्रहार गरे पनि गोलकिपर सुनारले बचाउ गरे।

त्यस्तै ६८ औ मिनेटमा नुर्लानले गरेको प्रहार बारमा लागेर बाहिरियो भने ६८ औँ मिनेटमा अन्जनले गरेको प्रहार चितवनका गोलकिपरले रक्षा गरे। खेल अबधिभर दबाब बनाएको ललितपुरले इन्ज्युरी समयमा गोलको सामना गरेको हो। पेनाल्टी एरियामा विनोद गुरुङले ह्यान्ड गरेपछि चितवनका अमित तामाङले पेनाल्टी प्रहार गर्दै गोल गरेका थिए। 

यससँगै चितवन र ललितपुरले समान १-१ अंक जोडेका छन्। काठमाडौं रेजर्स, विराटनगर, बुटवल–लुम्बिनीको समान ३–३ अंक छ।

पहिलो चरण सकिँदा पोखरा र धनगढी अंकविहीन छन्। पहिलो खेलमा काठमाडौंले पोखरामाथि १-० गोलको जित निकालेको थियो भने दोस्रो खेलमा विराटनगरले धनगढीलाई ३-० गोलले हराएको थियो।

तेस्रो खेलमा बुटबल–लुम्बिनीले पोखरालाई २-० गोलले हराएको थियो। पहिलाे चरणका चार खेलमा आठ गोल भएका छन्। जहाँ पराजय हुने कुनै टिमले गोल फर्काएका छैनन्।

आजको खेलमा चितवनका विशाल सुनार सुपर प्लेयर बने।