मुम्बईको ब्याटिङ नचलेपछि पञ्जाबद्वारा ९ विकेटले पराजित

काठमाडौं – रोहित शर्माले ६३ रन बनाए पनि १३१ रनमा समेटिएको मुम्बई इन्डियन्सले इन्डियन प्रिमिय लिग (आईपीएल)को शुक्रबार राति सम्पन्न खेलमा नौ विकेटको हार बेहोरेको छ।

चेन्नई रंगशालामा टस हारेर ब्याटिङको निम्तो पाएको मुम्बईले ६ विकेटको क्षतिमा पुरा ओभर खेल्दै १३१ रन बनाएको थियो। जवाफी ब्याटिङमा पञ्जाबले १७ ओभर चार बल खेल्दै एक विकेट गुमाएर १३२ रनका लक्ष्य पुरा गरेपछि खेल पञ्जाबले जित्यो।

पञ्जाबको जितका लागि कप्तान के एल राहुलले अविजित ६० रन प्रहार गरे। साथै क्रिस गेल ४३ रनमा अविजित रहे। मयंक अग्रवाल भने २५ रन बनाएर पेवेलियन फर्किए।

खेलमा मुम्बईका राहुल चहरले एक विकेट गिराएका थिए।

त्यसपहिले ब्याटिङ गरेको मुम्बईका सूर्यकुमार यादवले ३३ रन बनाउनुबाहेक अन्यले सम्झनलायक प्रदर्शन गरेनन्।

पञ्जाबका लागि मोहम्मद शामी र रवी विश्नोइले समान २–२ विकेट गिराए। त्यस्तै, समान १–१ विकेट लिनेमा दिपक होडा र अर्षदिप सिंह रहे।

यो जितसँगै पञ्जाबले जारी सिजनमा दोस्रो जित निकालेको छ। मुम्बईले पनि समान ५ खेलबाट दुई जित निकालेको छ। चार खेलमै जित निकालेको बैंगलोर तालिकाको शीर्षस्थानमा छ।