इलाममा पहिलो पटक विमान अवतरण

इलाम- निर्माणाधीन सुकिलुम्बा विमानस्थलबाट सोमबा सफल परीक्षण उडान भएको छ । 

तारा एयरको विमान मध्यान्ह १२ बजे सुकिलुम्बा विमानस्थलमा अवतरण हुँदा स्थानीयबासी खुसी भएका थिए । 

नेपाल नागरिक उड्डयन प्राधिकरणले गरेको पहिलो विमान उडान परीक्षण हेर्न सयौँ नागरिक विमानस्थल पुगेका थिए ।

चालकलार्इ माला लगाएर सम्मान
पहिलो पटक विमान लिएर आएको भन्दै जिल्लाबासीले विमान चालकद्वय प्रभाकर घिमिरे र सञ्जिव मिश्रलाई फूलमालासहित सम्मान गरेका थिए । 

झण्डै छ वर्षअघि निर्माण शुरु भएको विमानस्थलमा अब ग्राभेलको काम गरिने प्राधिकरणका प्रमुख इञ्जिनियर पुष्प न्यौपानेले जानकारी दिए  । सात सय मिटर लम्बाइ र अधिकतम ६० मिटर चौडाइको धावन मार्ग यस वर्ष एक करोड १५ लाखमा ठेक्कामा दिइएको थियो । 

तीन सय २५ रोपनी क्षेत्रफलमा फैलिएको विमानस्थल निर्माण गर्न स्थानीय निकाय र समाजसेवीको पहलमा जग्गा अधिग्रहण गरिएको थियो । 

विमानस्थल निर्माण भए पूर्वी पहाडी भेगका स्थानीयवासीलाई सहज हुनेछ । जिल्लाका पर्यटन व्यवसायीसमेत विमानस्थल निर्माणबाट गति लिने र पर्यटकको संख्यामा वृद्धि हुने अपेक्षामा छन् ।