राष्ट्रिय टिमका कप्तान किरणले धनगढी क्लबको कप्तानी गर्ने

काठमाडौं– नेपाली राष्ट्रिय फुटबल टिमका कप्तान किरणकुमार लिम्बूले भोलिबाट सुरु हुने नेपाल सुपर लिगको फ्रेन्चाइज टिम धनगढीको कप्तानी गर्ने भएका छन्।

'हामीले राष्ट्रिय टोलीका समेत कप्तान रहेका किरण कुमार लिम्बूलाई धनगढी एफसीको कप्तानको जिम्मा दिएका छौँ,’ धनगढीले जारी गरेको विज्ञप्तिमा भनिएको छ।

लिम्बूले नेपाली राष्ट्रिय टिमबाट ६८ खेल खेलेका छन्। उनकै कप्तानीमा पछिल्लो समय नेपालले थ्री नेसन्स कपको उपाधिसमेत जितेको थियो। राउन्डग्लास पञ्जाबबाट पनि कप्तानी सम्हाल्दै उनले क्लबलाई उनले आई लिगको उपाधि दिलाएका थिए। लिगमा उनी बेस्ट गोलकिपर बनेका थिए।

उनले बंगलादेश श्रीलंका र थाइल्यान्डका विभिन्न क्लबबाट पनि घरेलु लिगमा उपाधि जितिसकेका छन्। धनगढी एफसीले राष्ट्रिय टिमका मिडफिल्डर विशाल राईलाई ‘मार्की खेलाडी’ घोषणा गरेको थियो भने आइकनिक प्लेयरको रुपमा राष्ट्रिय टोलीका कप्तान किरण कुमार लिम्बूलाई अनुबन्ध गरेको थियो।

टोलीमा दुई विदेशी र दुई स्थानीय खेलाडीसमेत आबद्ध भएर प्रशिक्षण गरिरहेको क्लबले बताएको छ। टिमले पहिलो खेल आइतबार बिराटनगर सिटी एफसीसँग खेल्दै छ।

त्यस्तै क्लबको प्रशिक्षकमा नाइजेरियाली नागरिक तोपे फुजा छन् भने राष्ट्रिय टिमका पूर्वफरवार्ड एवम् उदीयमान प्रशिक्षक युगल किशोर राईलाई धनगढी एफसीले मुख्य प्रशिक्षकको रुपमा नियुक्त गरेको थियो।