रियल मड्रिड ला लिगाको शीर्षस्थानमा

काठमाडौं – प्रतिस्पर्धात्मक र उपाधिका लागि पेचिलो भिडन्त भइरहेको स्पेनिस शीर्ष डिभिजन फुटबल ला लिगामा फेरि एकपटक रियल मड्रिड शीर्षस्थानमा पुगेको छ।

बुधबार रातिको खेलमा कार्डिजलाई ३–० गोलले हराउँदै रियल मड्रिड शीर्षस्थानमा उक्लिएको हो।

रियलको जितका लागि करिम बेञ्जेमाले दुई गोल गरे। उनले पहिलो हाफको ३०औं मिनेटमा पेनाल्टीमा पाएको अवसरको सदुपयोग गर्दै गोल गरे भने ४०औं मिनेटमा कासिमेरोको पासमा व्यक्तिगत दोस्रो गोल गरे।

त्यसअघि खेलको ३३औं मिनेटमा अल्भेरो ओड्रियोजोलाले गोल गर्दै अग्रतालाई दोब्बर बनाइसकेका थिए।

यो जितसँगै रियलको ७० अंक छ। समान ७० अंक भएको एट्लेटिको मड्रिड हेड टू हेडका आधारमा पछि पर्दै दोस्रो स्थानमा छ। यद्यपी एट्लेटिकोको हातमा अझै एक खेल बाँकी छ।

रियलसँग समान ३२ खेल खेलेको सेभिया भने ६७ अंकका साथ तेस्रो स्थानमा छ। ३० खेलबाट बार्सिलोनाले ६५ अंक बनाएको छ।

गएरातिको खेलमा सेभियाले लेभान्टेलाई १–० गोलले हराएको थियो।