साढे चार लाखको बाउन्स चेक दिने केदार समातिए

काठमाडौं– जापानमा आकर्षक तलव सुविधा भएको कम्पनीमा काममा लगाइदिने भन्दै ठगि गर्ने एक जनालाई प्रहरीले पक्राउ गरेको छ । 

महानगरीय अपराध महाशाखाबाट खटिएको बिशेष अनुसन्धान टोलिल गोरखा जिल्ला भिमसेन गाउँपालिका–६ स्थायी ठेगाना भएका केदारनाथ ढकाललाई टेकुबाट पक्राउ गरेको हो । 
ढकालले गोरखा पालुङटार नगरपालिका–२ का कृष्ण प्रसाद पोखरेलबाट  रु.४ लाख ५० हजार ठगी गरेका थिए । 

पोखरेललाई 'भिषा प्रोसेस' लगायतका कागजातहरु मिलेन भनी विभिन्न वाहाना गरी आलटाल गर्दै लामोसमयदेखि सम्पर्क विहिन बनेका ढकाललाई भेट्दा  सिटिजन बैंक इन्टरनेशनल लिमिटेड सामाखुसी शाखाबाट रकम भुक्तानी लिनु भनी रु.४ लाख ५० हजारको चेक दिएका थिए । पिडितले सम्बन्धित बैंकबाट भुक्तानी लिन जाँदा रकम नभएको थाहा पाई बैंकिङ कसूर मुद्दामा जाहेरी दरखास्त दिएको प्रहरीले जनाएको छ । 

ढकाललाई बैंकिङ कसुर तथा सजाय ऐन,२०६४ अनुसार अनुसन्धान कारवाहीको लागि महानगरीय प्रहरी परिसर काठमाण्डौमा पठाईएको प्रहरीले जनाएको छ ।