त्रिदशीय टी–ट्वान्टी सिरिजमा नेपालको लगातार दोस्रो जित

काठमाडौं– नेपालले त्रिदेशीय टी–ट्वान्टी क्रिकेट सिरिजमा मलेसियालाई ९ विकेटले पराजित गरेको छ।

त्रिवि अन्तर्राष्ट्रिय क्रिकेट मैदानमा सोमबार कुशल भुर्तेलले अर्धशतकीय इनिङ खेल्दा नेपालले मलेसियालाई सहजै पराजित गरेको हो।
मलेसियाले दिएको ११० रनको सामान्य लक्ष्य नेपालले १२ ओभर १ बलमा १ विकेटको क्षतिमा पूरा गरेको हो।

नेपालको जितका नायक बनेका कुशलले अविजित रहँदै ६१ रनको अर्धशतकीय इनिङ खेलेका थिए। उनले ४१ बलमा ३ चौका र ५ छक्का प्रहार गर्दै ६१ रनको योगदान दिए।

नेदरल्यान्ड्सविरुद्धको खेलमा टी–ट्वान्टी अन्तर्राष्ट्रियमा डेब्यु गरेका उनको यो लगातार दोस्रो अर्धशतक हो। शनिबार नेदरल्यान्ड्सविरुद्धको खेलमा कुशलले ६२ रनको अर्धशतकीय इनिङ्स खेलेका थिए। उनले नेदरल्यान्ड्सविरुद्ध ४६ बलमा समान ५ चौका र छक्का प्रहार गर्दै ६२ रन जोडेका थिए।

टस हारेर पहिले ब्याटिङ गरेको मलेसियाले १६ ओभर ५ बलमा अलआउट हुँदै १ सय ९ रन बनाएको थियो। खराब सुरुवात गरेको मलेसियाले दोस्रो ओभरको चौथो बलमा पहिलो विकेट गुमाएको थियो।

जारी प्रतियिोगितामा नेपालको यो लगातार दोस्रो जित हो। नेपालले २ खेलमा ४ अंक जोडेर शीर्ष स्थानमा छ। नेपालले पहिलो खेलमा नेदरल्यान्ड्सलाई हराएको थियो।