मलेसिया र कतारबाट एकैदिन आयो १० नेपालीको शव, अझै १८ शव ल्याउन बाँकी (भिडियाेसहित)

काठमाडौं - वैदेशिक रोजगारीका लागि परदेश पुगेका १० जनाको शव शनिबार काठमाडौं आइपुगेको छ। 

मलेसियामा ज्यान गुमाएका ९ र कतारमा ज्यान गुमाएका एकजनाको शव नेपाल एअरलाइन्सको वाइडबडी विमानमार्फत् नेपाल ल्याइएको हो। 

वैदेशिक रोजगार बोर्डका परामर्शदाता श्रीकृष्ण चौलागाईका अनुसार मलेसियाबाट लालबहादुर महर (रूपन्देही), विद्यानन्द यादव (सर्लाही), इन्द्रदेव मन्डल, देवबहादुर भट्टराई, शिवराज दयाल पासवान, राजाराम बाठा, सन्तोष महरा, मुना कुहार, लालबहादुर शाह र देव कान्तीको शव आइपुगेको हाे। कतारबाट दीपक रिजालको शव ल्याइएको चौलागाईले जानकारी दिए। दुईजनाकाे ठेगाना खुले पनि अन्यकाे खुलेकाे छैन।

रोजगारीका लागि गएका उनीहरूको विभिन्न कारणले मृत्यु भएको वैदेशिक रोजगार बोर्डले जनाएको छ। बोर्डका अनुसार अझै विभिन्न देशमा १८ जना नेपालीको शव छ। मलेसियाबाट अझै चार शव आउन बाँकी छ। 

यस्तै साउदी अरबबाट १३ वटा शव झिकाउन बाँकी छ। कतारबाट एकजना नेपालीको शव रहेको बोर्डले जनाएको छ। दुर्घटनामा ज्यान गुमाएका र कामका क्रममा ज्यान गुमाएकाहरूको प्रहरी रिपोर्ट र बिमाको काम टुंगिन समय लाग्ने भएकाले कतिपय शव ल्याउन समस्या भएको वैदेशिक रोजगार बोर्डका प्रवक्ता दिनवन्धु सुवेदीले जानकारी दिए। 

गएको साउन महिनादेखि वैशाख ४ गतेसम्ममा वैदेशिक रोजगारीमा गएका ६४३ जनाले ज्यान गुमाएका छन्।