अाजका अखबारः प्रदेशको असन्तुष्टि र सांसद्को आक्रोश 

काठमडौं: राजधानीबाट प्रकाशीत हुने अखबारहरुले शुक्रबार मुख्यतः बजेटका विषयमा भइरहेका टिकाटिप्पणी र सुन तस्करीको आरोपीले आत्मासमर्पण गरेको विषयलाई प्राथमिकतामा पारेका छन् ।
 
नयाँ पत्रिका दैनिकले बजेटका विषयका प्रदेशले जनाएको असन्तुष्टिलाई मुख्य समाचार बनाएको छ । उसले प्रदेशका मुख्यमन्त्री र आर्थिकमामिला मन्त्रीहरुसंग कुराकानी गरेर यो खबर तयार पारेको हो ।
 
नयाँ पत्रिकाका अनुसार प्रदेश १ का आर्थिक मामिला मन्त्री इन्द्रबहादुर आङ्वोले बजेटले आर्थिक संघियता आत्मासात् नगरेको टिप्पणी गरेका छन् भने प्रदेश २ का मुख्यमन्त्री लालबाबु राउतले जनअपेक्षा प्रदेशसंग रहेको तर बजेट भने केन्द्रमुखी भएको गुनासो गरेका छन् । प्रदेश ३ का मुख्यमन्त्री डोरमणी पौडेलले संघियतालाई प्रभावकारी बनाउने बजेट नआएको बताएका छन् । प्रदेश ४ का मुख्यमन्त्री पृथ्वी सुव्बा गुरुङले बजेट केन्द्रीकृत मानसिकताबाट माथि नउठेको भन्दै असन्तुष्टि जनाएका छन् । 

प्रदेश ५ का सरकारका प्रवत्ता बैजनाथ चौधरीले बजेट संघियताको भावना विपरित भएको टिप्पणी गरेका छन् । प्रदेश ६ का आर्थिक मामिलामन्त्री प्रकाश ज्वालाले फेरि पनि केन्द्रबाट कर्णाली ठगिएको गुनासो गरेका छन् भने प्रदेश ७ का आर्थिक मामिलामन्त्री झपटबहादुर बोहोराले हक हस्तान्तरण बारे बजेट मौन रहेको बताएका छन् । 

यस्तै आजका पत्रपत्रिकाले सरकारले दिएको ४ करोड आफ्नो तजबिजले खर्चिन नपाउँदा सांसदहरु आक्रोशित बनेको विषयलाई पनि विशेष महत्व दिएका छन् । कान्तिपुर दैनिकले यसै खबरलाई मुख्य समाचार बनाएको छ भने कारोबार दैनिकले पनि महत्वका साथ छापेको छ । 

सुन तस्करीका आरोपी एसएसपी श्याम खत्रीले बिहीबार जिल्ला अदालत मोरङमा आत्मासमपर्ण गरेको विषयलाई आजका सबैजसो पत्रिकाले प्राथमिकतामा पारेका छन् । नागरिक दैनिकले यो खबरसंगै यसरी हुन्थ्यो सेटिङ शीर्षक दिएर अर्को लेखेको छ । यस्तै उसले सिन्डकेट खारेज भएपनि त्यसको महशुस जनताले गर्न नपाएको विषयलाई मुख्य समाचार बनाएको छ । 

अन्नपूर्ण पोष्ट्ले भने प्रधानमन्त्रीको हाइटेक प्रचार शैली शीर्षक दिएर मुख्य समाचार लेखेको छ भने हिलारी स्टेपमाथि शेर्पा गाइडको हत्या आशंका शीर्षकमा अर्को समाचार छापेको छ ।