माधव–झलनाथलाई कारबाही गर्ने चेतावनी दिँदै प्रधानमन्त्री ओलीले भने- सभामुख सरकारविरोधी ‘सेटिङ’ मा छन्

काठमाडौं – प्रधानमन्त्री एवं एमाले अध्यक्ष केपी शर्मा ओलीले वरिष्ठ नेता माधवकुमार नेपाल र झलनाथ खनाललाई कारबाही गर्ने चेतावनी दिएका छन्। 

आज बसेको संसदीय दलको बैठकलाई सम्बोधन गर्दै उनले आत्मआलोचना गरे सोच्न सकिने नत्र कारबाही प्रक्रिया अगाडि बढाउने बताएका हुन्। 

‘पार्टी र सरकारको बदनाम गर्ने नियतले भएको त्यस्तो भेला नगर्न निर्देशन दिँदादिँदै भेला गरियो,’ उनले भने, ‘निर्लज्जापूर्वक कम्युनिस्ट अन्दोलनकै इतिहासमा कलंकको रूपमा चिनिएको भेलाका आयोजक अगुवालाई स्पष्टीकरण सोधिनेछ। सच्चिएर आत्मआलोचना गरे सोच्न सकिने छ नत्र कारबाही अगाडि बढाइने छ।’ 

अध्यक्ष ओलीले सभामुख सरकारविरोधी ‘सेटिङ’ मा रहेको आरोप लगाएका छन्। 

‘हिजो सदन चलेको होइन, भाषण चलेको हो,’ उनले भने, ‘सभामुख सदन सरकारविरुद्ध प्रयोग गर्न सिपालु छन्।’ 

उनले राजीनामा माग्नेहरूलाई आफू मन नपरेको हो भने अविश्वासको प्रस्ताव ल्याउन चुनौती पनि दिएका छन्। 

यस्तै सरकारले सदनलाई बिजनेस दिएन भन्नु गलत भएको उनको भनाइ छ। 

‘अध्यादेश र विधेकहरू प्रशस्त पठाएका छौं,’ उनले भने। 

यसैबीच उनले नेता वामदेव गौतमलाई स्वागत गरेका छन्। ‘ त्यस्ता अराजक र गुटबाजलाई समेटेर पार्टी एकता गर्न वामदेव कमरेड निकै लाग्नु भयो,’ उनले भने, ‘सायद थाक्नु भयो, अब ढुक्क भएर यो आन्दोलन बलियो बनाउन लाग्नुस्।