युगान्डामा एक नेपालीको मृत्यु

युगान्डामा एक नेपाली युवाले आत्महत्या गरेका छन् । स्याङ्जाको कुवाकोट-३, अन्धिघाटका ४० वर्षीय चिरञ्जीवी पङ्गेनीले अफ्रिकी मुलुक युगान्डामा म‌ंगलबार आत्महत्या गरेका हुन् । 

गैर आवासीय नेपाली स‌ंघ युगान्डाका अनुसार शव पोस्टमार्टमका लागि आफन्तको स्वीकृति आइसकेको छैन । घटनाबारे युगान्डा प्रहरीले आबश्यक जाँचबुझ गरिरहेको जनाइएको छ ।

बुढाथोकीका परिवारलार्इ ३१ लाख

यसैबीच गत वर्ष युगान्डामा मृत्यु भएका भोजपुरको षडानन्द नगरपालिका, केउरेनीपानीस्थित साल्माका नेपाली युवा पोस्टबहादुर बुढाथोकीका परिवारलाई एनआरएनए युगान्डाको पहलमा उनी कार्यरत कम्पनी कामुली सुगर लिमिटेडबाट राहत र बिमा बापत नेपाली २३ लाख रुपैयाँ नेपाल पठाइएको छ ।    

एनआरएनए युगान्डाका अध्यक्ष राजमणि भन्डारीका अनुसार बुढाथोकीकी आमा इन्द्रमाया बुढाथोकीको खातामा पाँच हजार चार सय ५० अमेरिकन डलर र छोरी अन्जली बुढाथोकीको नाममा १६ हजार नौ सय ५० अमेरिकन डलर बैंकबाट पठाइएको हो । छोरी नाबालिक हुन्जेल मुद्दती खातामा उनको रकम रहने ब्यबस्था गरिएको छ ।