कतारबाट तीन नेपालीको उद्दार

बैदेशिक रोजगारीका लागि कतार पुगेका तीन नेपाली कामदारको उद्दार गरिएको छ । उनीहरुलार्इ नेपाल पत्रकार महासंघको अगुवाई उद्दार गरिएको हो । 

काठमाडौंस्थित रोयल इन्टरनेसनल ओभरसिज प्रालिबाट कतार पुगेका उनीहरुलार्इ सम्झौता अनुसारको सुविधा नपाएर बिचल्लीमा परेका अर्घाखाँचीको भूमिकास्थान-७ का तिलबहादुर रायमाझी, नवलपरासीको सुनवल-१ का भीम चौधरी र रौतहटका सन्तोष पण्डितलाई घर फर्काउन सहयोग गरिएको हो । 

६ अप्रिलमा कतार पुगेका उनीहरुलार्इ कम्पनीले गाडीको मर्मत सम्हार तथा पेन्टरको काम लगाउने भनेर म्यानपावर कम्पनीलाई भिसा दिएको थियो । तर तीनैजना कामदारलाई उक्त काम गर्न नआएको भन्दै रोजगारदाताले यातना दिएर खाने बस्ने सुविधा नदिँदा बिचल्लीमा परेका थिए । 

युएईमा कार्यरत रहँदा चिनजानका साथीलाई पीडितमध्येका तिल बहादुरले सम्पर्क गरेपछि दुबईमा काम गर्ने नेपालीमार्फत कतारमा कार्यरत अर्घाखाँची सेवा समाज कतारका द्वितीय उपाध्यक्ष रामप्रसाद पराजुली र अर्घाखाँची सेवा समाजका महासचिव समेत रहेका पत्रकार टेकराज थापाले पीडितहरुलाई खाद्यान्न र नगद सहयोग गरेका थिए । 

पत्रकार थापाले पीडितहरुबारेमा नेपाल पत्रकार महासंघ कतार शाखाका अध्यक्ष करिम बक्स मियाँलाई जानकारी दिएलगत्तै अध्यक्ष एजेन्टलाई सम्पर्कमा ल्याई पीडितहरुलाई यथाशक्य उद्दार गर्न ताकेता गरेर दुताबासलाई जानकारी गराएका थिए ।